SEKOMS Sei Minimiza Formasaun ba Funsionáriu iha Estranjeiru

DILI, 29 novembru 2019 (TATOLI)-Sekretáriu Estadu Komunikasaun Sosiál (SECOMS-sigla portugés) Merício Juvinal dos Reis “Akara” deklara, ba tinan 2020 sei limita númeru formasaun ba funsionáriu iha estranjeiru hodi reforsa iha rai laran ho objetivu atu poupa osan estadu sirkula ba nasaun seluk.
Notísia Relevante : SEKOMS Asina MoU Ho Metro TV
“Polítika SEKOMS agora maka prefere formasaun iha rai-laran,” afirma Merício Juvinal dos Reis “Akara”, ohin, iha salaun enkontru Prezidénsia Konsellu Ministru, Palacio do Governo.
Tuir estudu tékniku SEKOMS nian katak formasaun iha rai-laran hodi hamenus ona gastu orsamentu ba billete aviaun, otél, konsumu no seluk tan. Tanba akontese durante ne’e gastu orsamentu ho montante boot maibé númeru partisipante formasaun menus. Tanba ne’e, tempu ona atu governu dezenvolve sentru formasaun sira iha rai laran ho kualidade hodi fó fornese formasaun ba funsionáriu públiku.
“Ba oin ita sei konvida formadór rai li’ur sira mai iha ita-nia rai hodi fó formasaun, nia sei hela iha nee no ita selu, maibé osan ne’e balun nia sei gasta iha ita nia rain,” nia hateten.
Nia dehan, iha posibilidade sei haruka formandu sira ba estranjeiru bainhira estuda iha área espesífiku ne’ebé seidauk eziste iha Timor-Leste.
Jornalista : Agapito dos Santos
Editór : Francisco Simões

