DILI, 02 dezembru 2019 (TATOLI)- Suspeitu JSS (17) ne’ebé soke mate matebian Nonato Lopes ho nia-oan Zonato Borges Lopes, sábadu (30/11/2019), kumpre hela Termu Identidade Rezidénsia (TIR) hosi desizaun Ministériu Públiku (MP).
Suspeitu JSS kondús karreta Ranger ho xapa matríkula 26554 mai hosi área Pantai Kelapa soke uluk karreta mutin ida ne’ebé para hela iha Supermerkadu Kampung Alor nian oin. Hafoin soke, suspeitu tenta halai, ikus mai soke hasoru matebian ho nian oan ho motór Revo Honda Xapa L-67911 ne’ebé mai hosi área Motaél.
Asidente tráfegu ne’e rezulta matebian rua ne’e mate iha fatin tanba hetan pankada makas iha ulun no oin nakfera raan sai makas.
Segundu Komandante Polisia Munisípiu Dili, Superintendente Asistente Polisia, Euclides Belo dehan, kazu ne’e rasik polisia tránzitu halo hela prosesu investigasaun no aprezenta ba parte Ministériu Públiku (MP) halo koordenasaun ho polisia hodi fó TIR ba suspeitu.
“Depois suspeitu submete ba prosesu investigasaun iha sábadu no domingu hodi a-guarda iha komandu, no seksaun tránzitu husu orientasaun ba hosi Ministériu Públiku no Ministériu Públiku haruka para bele fó Termu Identidade Rezidénsia (TIR) ba suspeitu depois submete nafatin ba prosesu investigasaun hodi hein família sira komunika ba malu,” dehan Euclides ba jornalista, ohin, iha Caicoli, Dili.
Euclides dehan, parte família vítima no família suspeitu nian mós hasoru malu ona hodi rezolve problema serimónia funerál ba matebian rua hotu foin kontinua prosesa kazu ne’e.
Hatán kona-ba lamentasaun públiku kona-ba dala barak kazu soke mate ema, suspeitu sira sempre livre, Euclides esplika, prosesu kazu hotu-hotu nia na’in loloos maka Ministériu Públiku. Bainhira Ministériu Públiku husu fó TIR ba suspeitu sira, polisia halo tuir de’it desizaun.
Euclides hatutan, PNTL mós garante suspeitu sei la halai, tanba suspeitu nia inan Angelina Saldanha nu’udar mós Prokuradóra hatene lei no prosesu sira.
Kona-ba informasaun ne’ebé sirkula katak, suspeitu treinu hela karreta maka soke, Euclides dehan, nia parte sei hein rezultadu investigasaun tránzitu mak foin bele hatene.
Euclides hatutan, suspeitu mezmu foin halo tinan 17, maibé iha karta kondusaun ne’ebé emite hosi Diresaun Nasionál Transporte no Terrestre (DNTT).
Karreta ho motór ne’ebé antes polisia lori ba asegura iha edifísiu Komandu Polisia Caicoli Dili agora lori para fali iha Ministériu Públiku.
Antes ne’e, maun husi família matebian, Domingos Borges husu ba polisia atu prosesa kazu ne’e tuir lei.
“Kazu ne’e akontese ona, ami hanesan família husu atu prosesa maka ema ida soke ne’e tuir lei,” nia hatete ba jornalista.
Matebian durante ne’e servisu nu’udar motorista iha Portu Dili no iha dadeer ne’e ho nia oan sai ba servisu fatin. Nune’e iha loro-manas sai atu fila ba uma hodi han meiudia maka hasoru fali dezastre.
Matebian na’in rua, família sira lori ona ba Munisípiu Bobonaro Suku Memo, Postu Administrativu Maliana, hodi hala’o serimónia funerál.
Jornalista : Eugénio Pereira
Editór : Francisco Simões
