DILI, 03 dezembru 2019 (TATOLI)–Iha planu orsamentu jerál estadu (OJE) tinan fiskál 2020, Sekretáriu Estadu Juventude no Desportu (SEJD) prevee orsamentu tokon $1,5 hodi fó insentivu ba membru Konsellu Polisiamentu Komunitáriu (KPK) atu bele kumpre sira nia misaun importante tolu.
Notísia Relevante : Polisia Dili Sei Kompleta Estrutura KPK iha Suku 34
Sekretáriu Estadu Juventude no Desportu (SEJD), Nelio Isaac Sarmento, esplika, misaun importante tolu ne’ebé KPK sira tenke kumpre maka, KPK kada bairru tenke garante seguransa moris hakmatek ba povu, bairru sira tenke moos ka livre hosi fo’er no bairru sira tenke kriativu organiza osan hodi hadi’a ekonomia grupu KPK hodi povu partisipa iha kualkér programa no atividade hotu-hotu ne’ebé kontribui ba dezenvolvimentu Timor-Leste.
“Governu sei husu buat tolu de’it ba ita nia KPK sira. See sira hetan apoiu insentivu hosi governu, sira tenke responsabiliza katak, iha sira nia bairru la iha problema no povu moris hakmatek ho saudavel,” hateten Nelio Isaac Sarmento, ohin, ba jornalista iha Parlamentu Nasionál.
Notísia Relevante : PNTL Bobonaro Sei Fó Posse ba Membru KPK 400
Intensaun seluk hosi polítika governu nian maka hakarak ajuda membru KPK ne’ebé iha família bele hetan osan ajuda nesesidade família iha moris, tanba KPK sira dala ruma husik família hadeer iha tempu kalan ajuda governu no polisia para buka rezolve kazu konflitu ruma bainhira akontese.
Nelio Isaac esplika, tinan barak ona governu haree membru KPK sira ne’ebé kompostu hosi juventude, autoridade suku balun iha kriatividade di’ak tebes no organiza povu sira oinsá kria buka rezolve problema sira ne’ebé mosu.
SEJD sei koordena ho Ministériu Interior no Komandu Polisia Nasionál Timor-Leste (PNTL) atu haree too agora membru KPK iha Dili, Bobonaro, Oe-Cusse no munisipiu seluk tan hira maka estabelese ona hodi governu bele iha dadus aloka osan insentivu ne’e bainhira hetan aprovasaun hosi Parlamentu Nasionál.
Notísia Relevante : Governu Diskute Subsídiu ba KPK
Antes ne’e, Adjuntu Komandante PNTL Munisípiu Dili, Superintendente Xefe, Euclides Belo, apresia servisu KPK nian durante ne’e kontribui makas tebes ba atu redús problema krime, violénsia no disputa rai ne’ebé akontese iha povu nian leet.
“Ha’u orgullu no apresia tebes ita nia KPK sira mezmu servisu voluntáriu, maibé sira ativu tebes ajuda polisia atu buka rezolve problema iha kada bairru,” dehan Euclides.
Iha Munisípiu Dili ne’ebé kompostu hosi suku 34, iha membru KPK suku 22 maka simu ona pose no tuir formasaun no falta estrutura KPK suku 12 iha tempu besik sei simu tan pose.
Notísia Relevante : PNTL Estabelese ona KPK iha Suku 251
Jornalista : Eugénio Pereira
Editór : Francisco Simões
