DILI, 05 dezembru 2019 (TATOLI) – Reprezentante Estadu Vatikanu iha Timor-Leste (TL), Núnsiu Apostóliku Monseñor Marco Sprizzi, hateten Papa Francisco hakarak atu hala’o Vizita mai Timór maibé to’o agora seidauk iha desizaun.
“Ha’u mai hasoru malu ho Prezidente Repúblika hodi hato’o Santu Padre ninia sentimentu ba nasaun no mós ba timoroan sira, inklui Prezidente Repúblika rasik. Santu Padre Francisco hakarak no deseja atu mai vizita Timór, maski to’o agora seidauk iha desizaun ruma”, Marco Sprizzi hato’o asuntu ne’e, hafoin hasoru malu ho Prezidente Repúblika (PR), Francisco Guterres Lú Olo, iha Palásiu Prezidensiál, Bairro Pité, kinta ne’e.
Reprezentante Estadu Vatikanu ne’e mós konsidera notísia balun ne’ebé antes ne’e fó sai iha mídia balun katak, tinan oin Papa Francisco hakarak vizita Timór ne’e informasaun falsu.
“Notísia ne’ebé antes ne’e ema publika katak, Santu Padre atu mai Timór ne’e hanesan informasaun ezajeradu tanba informasaun loloos ne’e seidauk iha desizaun finál husi Vatikanu no seidauk iha loron fiksu”, nia realsa.
Núnsiu Apostóliku hatutan, Santu Padre rasik akompaña no rekoñese di’ak situasaun iha Timór, tanba informadu husi nunsiatura, husi Embaixada iha Timór.
Tanba ne’e, nia husu atu timoroan hotu akompaña ho esperansa nafatin, kona-ba Papa Francisco ninia dezeju ne’e atu bele tranforma ba realidade.
Kona-ba kritéria vizita Santu Padre nian ba nasaun ida, Marco Sprizzi esplika, kritéria ne’e tenke iha pedidu husi nasaun ne’e tanba Papa sempre responde ba konvite.
“Konvite ne’e normalmente mai husi Xefe Estadu, nune’e mós mai husi Bispu sira iha nasaun ne’e. Baibain iha konvite rua, konvite ida mai husi Xefe Estadu ne’ebé reprezenta Estadu, no mós pedidu ida husi Bispu sira reprezenta Igreja. Konvite rua ne’e kuandu to’o ona Vatikanu, Papa responde bazeia ba ninia programa rasik tanba Papa simu konvite barak liu”, nia esplika.
Reprezentante Vatikanu ne’e fó hanoin katak, oras ne’e daudaun Papa hala’o hela vizita iha Japaun no Thailándia, nu’udar nasaun boot rua ne’ebé ninia populasaun Katólika minoria no antes ne’e mós Papa vizita ona nasaun sira iha Amérika Latina hanesan Méxiku no país sira seluk ne’ebé populasaun Katólika minoria.”Entaun, ho ida ne’e bele dehan mós katak, kritéria ne’e la’ós determinante tanba Papa la’ós vizita de’it nasaun sira ne’ebé maioria Katólika maibé vizita mós país sira musulmanu, budista no país ne’ebé moris ho kualkér relijiaun”, nia subliña tan.
Nia salienta, iha Papa nia fuan, partikularmente nasaun ne’ebé mak maioria Katóliku hanesan Timór nu’udár Maromak nia-oan no hanesan mós Kristu nia disípilu no membru Igreja, maibé Papa mós hadomi ema hotu iha mundu tomak ne’ebé iha boa vontade, maski pertense ba relijiaun seluk.
Jornalista : Cipriano Colo
Editór: Xisto Freitas
