DILI,11 dezembru 2019 (TATOLI)-Diretór Jerál hosi Sekretáriu Estadu Igualdade Jéneru no Inkluzaun (SEII) Armando da Costa, hateten Timoroan hotu tenke kontinua iha kompromisiu polítika atu hapara violénsia hasoru feto ho labarik.
Durante serimonia enseramentu ba kampaña ativizmu loron 16, iha tersa (10/12) iha knua joventude Pateo Colmera, Diretór, Armando da Costa, reprezenta Sekretáriu Estadu Igualdade Jéneru no Inkluzaun hateten Timoroan presiza promove identidade kulturál atu oinsá respeita no proteje direitu feto no labarik.
Notísia Relevante: SEII Hala’o Kampaña Hapara Violénsia Hasoru Feto ho Labarik
Kampaña loron 16 lansa ona iha loron 23 fulan-novembru iha Fatuberliu Munisípiu Manufahi, no tersa (10/12) ensera iha Munisípiu Dili ho tema hapara no hakotu violénsia hasoru feto no labarik feto hodi haburas relasaun saudavel iha kontestu relasaun igualdade ne’ebé refere liubá jerasaun no ba jerasaun.
“Iha enseramentu ne’e ha’u hakarak husu ita hotu presiza halo komitmentu ida katak mai ita kontinua promove identidade kulturál espesialmente ba feto no labarik feto,” katak, Armando da Costa.
Notísia Relevante:“Hamutuk Hakotu Violénsia Hasoru Feto no Labarik Feto:Haburas Relasaun Saudável”
Ba labarik feto ho mane, Nia apela atu promove relasaun saudavel entre sira nune’e bele evita no hamenus violénsia kontra labarik feto.
Tuir Nia dialogu nu’udar meius importante ida atu resolve kualker problema bainhira mosu desentendimentu iha família, sosiadade no komunidade.
Notísia Relevante:Relatóriu SEII: Feto Kazada Porsentu 59 Hetan Violénsia Fízika
Ikus liu, nia representa SEII hato’o agradesimentu ba Generation Equality ho Uniaun Europeia tanba organiza ona eventu ho susesu hodi selebra loron mundíal direitu umanu.
Jornalista:Osória Marques
Editór:Francisco Simões