DILI, 29 dezembru 2019 (TATOLI)-Udan boot oras rua nia laran ne’ebé akontese domingu (29/12/2019), tuku 15:00 OTL too tuku 17:00 OTL, lori sofrimentu boot ba komunidade uma kain 50-resin iha Aldeia Ramelau ho Aldeia Lauloro, Suku Manleuana, Postu Administrativu Don Aleixo, Munisípiu Dili.
Udan boot sobu moru protesaun mota nian hodi lori fo’er no bee merak ‘lulun’ sira nia uma to’o uma balun monu ‘hakdasak’ tetuk hanesan ho rai.
Tuir observasaun Ajénsia TATOLI iha fatin akontesimentu, inundasaun ne’e la’ós sobu de’it uma, maibé lori mós komunidade nia animal hakiak hanesan fahi, motor balun, karreta ho sasán nesesidade uma laran nian seluk tan.
Mota ne’ebé sobu husi área foho leten Aldeia Ramelau nian tun makas lori tahu nurak tama mós komunidade sira nia uma laran halo inundasaun makas too estrada laran.
Alende ida ne’e, iha Adeia Evaka- Aimutin nian, mota sobu mós ponte riin besik Sentru Konbustivél Manleuana tohar hodi halo fo’er nakonu no intupidu makas iha estrada ninin halo bee tama fali ba populasaun sira nia uma laran.
Tuir Xefe Suku Maneluana, Jacob Soares Tilman informa, mota sobu moru protesaun ne’ebé kompañia nasionál sira harii la iha kualidade. Nune’e bee halai tama sobu fali komunidade nia uma.
“Ami iha ne’e Aldeia Ramelau no Louloro tun too kedas ba área estrada boot Sentru Kombustivel nian ne’e mós mota sobu no tama too komunidade sira nia uma no halo populasaun sira uma nakonu ho tahu nurak no fo’er,” dehan Xefe Suku Jacob informa ba Ajénsia TATOLI.
Xefe Suku ne’e husu ba Ministériu Obras Públika (MOP) tenke husu ba kompañia nasionál ne’ebé halo moru protesaun mota nian atu responsabiliza, halo projetu moru protesaun la iha kualidade.
“Ha’u husu ba kompañia sira halo projetu tenke di’ak, se imi halo arbiru de’it ikus mai mota tun sobu ami nia povu mak sai fali vítima,” nia lamenta.
Xefe Suku Jacob koordena kedas ho xefe aldeia Ramelau no Louloro hodi rekolla ona dadus uma sira ne’ebé hetan estragus hodi aprezenta ba ekipa governu.
Sekretáriu Estadu Protesaun Sivíl (SEPS), Alexandrino de Araújo, akompaña husi Diretór Bombeiru, Paulo Maia ho ekipa too kedas fatin akontesimentu hodi koordena ho autoridade no komunidade sira ajuda evakua populasaun sira ne’ebé uma hetan estragus hodi ba hela iha fatin ne’ebé seguru.
Sekretáriu Estadu Alexandrino mós kontaktu kedas ekipa Institutu Jestaun Ekipamentu (IJE) hodi koloka ekipamentu pezadu atu provizóriu suru rai-henek hodi taka mota dalan para evita bee labele tun sobu uma komunidade.
Nia dehan, governu rasik observa iha área Becora, Tuana Laran, Caicoli, Bairru-Pité nian mós tama uma komunidade nian inklui iha kapitál Dili liu-liu área Caicoli hetan inundasaun maka’as.
Governante promote ba vítima sira, hahú ohin, ekipa Diresaun Nasionál Protesaun Sivíl no Ministériu Solidariedade Sosiál no Inkluzaun (MSSI) sei tun direita hodi fó apoiu umanitáriu no ekipamentu balun hodi tulun vítima sira.
Jornalista : Eugénio Pereira
Editór : Francisco Simões
