DILI,06 janeiru 2020 (TATOLI)-Família uma ka’in atus rua resin maka dadauk ne’e konstrui ona uma iha área mota ninin Ponte CPLP no Ponte Hinode Comoro hodi hela tanba laiha rai maske fatin ne’ebá kategoria ba risku dezastre naturaís.
Xefe Suku Comoro, Postu Administrativu Dom Aleixo, Munisípiu Dili, Eurico da Costa de Jesus, hateten antes ne’e nia parte bolu ona atensaun ba okupante hirak ne’e atu muda sai hosi fatin ne’ebá, tanba konsidera sai ameasadu ba mota iha tempu udan.
“Ami avizu ba sira beibeik ona maibé sira dehan fatin laiha entaun sira tenke konstrui uma iha mota ninin hodi buka moris. Uluk totál família 47 maibé agora sa’e ba 200-resin famílias.”, dehan, Xefe Suku Comoro ne’e ba Jornalista TATOLI, iha Comoro ohin.
Notísia Relevante: Governu “Alerta” ba Povu Hadook-An husi Fatin Risku Dezastre
Nia hateten, atu evita mosu dezastre naturaís iha futuru, Ministériu Obrás Públikas (MOP), Sekretáriu Estadu Protesaun Sivíl no Diresaun Nasionál Terras no propriedades (DNTP)presiza haree polítika ida di’ak hodi muda sai komunidade sira hosi fatin ne’ebá.
“Prevene no asegura ita-nia komunidade sira ne’ebé mak kontinua hela iha mota ninin hanesan mota Comoro nian,”tenik tan.
Notísia Relevante:Mota Sobu Uma 50-Resin iha Manleuana
Iha parte seluk, komunidade Suku Comoro, Pasquela de Sousa, konfesa ba TATOLI katak sira harii uma iha mota ninin tanba rai laiha maske konsiente katak fatin ne’e risku ba dezastre naturaís.
“Ami hela iha mota ninin Comoro nian ne’e ami mak hakarak rasik no laiha ema ida mak haruka ami maibé nesesidade ekonómia mak obriga duni ami,” katak Nia.
Nia hatutan rai ne’ebé maka dadaun ne’e nia harii uma ba sosa tutan hosi komunidade seluk ho valór $ 800.
Jornalista Osória Marques
Editór:Francisco Simões
