Benefisiáriu 28.558 maka Simu ona Pensaun Veteranu
DILI,13 janeiru 2020 (TATOLI)-Governu liuhosi Sekretáriu Estadu Kombatente Libertasaun Nasionál (SEACLN-sigla portugés)durante tinan 2019, halo ona prosesu pagamentu ba benefisiáriu hamutuk 28.558 hosi pensaun veteranu no martir ho orsamentu hamutuk millaun $ 89.256,421.
Pensaun veteranu no kombatente hamutuk $ 14.867, no pensaun ba Martirés 13.691.
Diretór Nasionál Pensaun no Subvensaun (SEACLN), Manuel Araújo dos Santos, relata benefisiáriu hosi Munisípiu Aileu hamutuk 1.395, Ainaro 2.206, Baucau 4.136, Bobonaro 2.528, Covalima 1.424, Dili 2.119, Ermera 3.623, Lautem 2.42, Liquiça 1.419, Manatuto 2.141, Manufahi 1.456, Oé-Cusse 404, Viqueque 3.256 no sidadaun Timoroan ne’ebé hela iha Diáspora hamutuk 28.
“Iha tinan kotuk 2019 ba lista naran aprovadu pagamentu ba pensaun konbatente no mártir hamutuk 28.558,”tenik, Diretór Nasionál Pensaun no Subvensaun (SEACLN) ne’e, ba TATOLI, iha Caicoli Dili, ohin.
Nia dehan, pensaun ne’e fahe ba kategoria sira hanesan pensaun espesiál reforma ba eskalaun dahuluk ho sidadaun sira ne’ebé fó ona kontribuisaun funu durante tinan 15 to’o 24, pensaun espesiál reforma ba eskalaun daruak ho dedikasaun tinan 15-19.
Enkuantu, pensaun espesiál reforma ho valór superior distinsaun liuliu ba figura nasionál sira, pensaun subsisténsia fó ba sidadaun ne’ebé kontribui ona funu durante tinan 8-14, no pensaun sobrevivensia ba mártir sira.
Ikusliu maka prestasaun unika ba sidadaun ne’ebé kontribui funu durante tinan 4-7 hodi simu pensaun dala ida de’it.
Iha parte seluk, iha tinan 2019, SEACLN mos hapara ona pensaun ba família martír hamutuk 518 tanba mate ona.
Entretantu, pensaun hirak ne’e hatuur ona iha dekretu lei númeru 3/2006 no primeiru alterasaun dekretu lei 9/2009 estatutu kombatente libertasaun nasionál hodi fó rekoñesementu ba sidadaun hotu-hotu ne’ebé partisipa iha prosesu luta ba libertasaun nasionál.
Jornalista:Nelson de Sousa
Editór :Francisco Simões
