DILI, 14 janeiru 2020 (TATOLI) – Ministériu Interiór liuhusi Diresaun Nasionál Servisu Migrasaun servisu hamutuk ho Ministériu Administrasaun Interna Austrália nian hodi realiza formasaun ba funsionáriu Servisu Migrasaun Timor-Leste kona-ba ezaminasaun ba imajen no dokumentu sidadaun estranjeiru sira ne’ebé hala’o viajen tama sai fronteira Timor-Leste.
Notísia Relevante : Austrália Sei Fasilita Formasaun ba Korpu Bombeiru TL
Formasaun ne’ebé hala’o iha Sentru Formasaun Akademia Polisia Comoro, Dili, hahú tersa to’o kuarta (14-15/01/2020), aprezenta formadór nu’udar peritu ba area refere, Philip Muller husi Australia.
Philip Muller dehan, formasaun ne’e importante tebes atu aumenta rekursu funsionáriu Migrasaun Timor-Leste hodi halo jestaun kontrolu servisu iha fronteira sira ho di’ak liu.
“Ita fó formasaun para ita nia Migrasaun sira atu halo jestaun servisu oinsá halo kontrolu di’ak liután iha fronteira sira, oinsá halo identifikasaun ba ema nia oin para bele prevene karik ema ruma uza fali ema seluk imajen ka dokumentu ho pasaporte ita bele identifika klaru hodi evita kualkér krime,” Philip Muller hateten.
Notísia Relevante : Austrália Sei Oferese Bolsa Estudu Ba Estudante 200 Iha Nível Sekundária
Philip espera, liuhusi formasaun ne’e formadu sira bele halo servisu ho kuidadu atu kontrola kualkér ema sira ne’ebé halo vizita tama sai fronteira ho mekanizmu kontrolu ne’ebé di’ak.
Tuir nia haree katak, ohin loron iha mundu globál no modernu ema ilegál barak hala’o viajen ba mai nasaun sira uza dokumentu falsu barak, tanba ne’e husu atu Timor-Leste mós presiza halo kontrolu másimu iha ninia fronteira hotu.
Governu Austrália rasik sente apresia tebes kada tinan sempre fó apoiu formasaun ba Servisu Migrasaun Timor-Leste no Polisia Nasional Timor-Leste (PNTL).
Iha fatin hanesan, Diretór Jerál Servisu Migrasaun Timor-Leste, Superintendente Polisia, Agostinho Gomes, mós konsidera, formasaun ne’e importante hodi funsionáriu sira halo identifikasaun ba ema nia oin no imajen sira iha pasaporte.
“Formasaun ida ne’e atu aumenta ita nia koñesimentu, oinsá bele halo servisu di’ak liu tan,” hateten Agostinho Gomes.
Matéria seluk ne’ebé formadu sira fó maka oinsá hadi’a jestaun administrasaun nian hodi halo atendimentu ba kualkér servisu sira ne’ebé haree liu ba dokumentu sidadaun estranjeiru nian.
Jornalista : Eugénio Pereira
Editór : Francisco Simões
