2019, Bombeiru Dili Halo Intervensaun ba Dezastre Ahi Han Uma 89
DILI, 15 janeiru 2020 (TATOLI)-Durante tinan 2019, Servisu Bombeiru Munisípiu Dili halo intervensaun ba dezastre ahi han uma 89.
Notísia Relevante : Ai-Huun Ne’ebé Fó Risku ba Komunidade Koordena ho Bombeiru
Bombeiru Munisípiu Dili ninia area jurisdisaun la’ós kobre de’it Dili, maibé kobre mós Munisípiu Liquiça ho Ermera.
Komandante Bombeiru Munisípiu Dili, Fernando da Costa, ohin, informa ba Ajénsia TATOLI iha nia servisu fatin, Caicoli, Dili katak, durante ne’e sira nia parte mós halo atuasaun emerjénsia hanesan ai-monu iha estrada públiku, ai-monu ba komunidade nia uma, asidente rodoviáriu, inundasaun bee sa’e no halo evakuasaun ba vítima sira ne’ebé afetadu husi dezastre.
Bombeiru mós fó apoiu emerjénsia ba protesaun salvamentu ema no apoiu bee-moos no apoiu ambulánsia ba asidente rodoviáriu ba ema.
Korpu Bombeiru Dili iha nia membru na’in 43 ne’ebé mak kontinua hala’o sira nia knar hodi fó atendimentu no intervensaun ba situasaun emerjénsia sira ne’ebé mak iha relasaun ho Bombeiru nia servisu.
Jornalista : Nelson de Sousa
Editór : Francisco Simões
