DILI, 16 janeiru 2020 (TATOLI)–Liuhusi investigasaun preliminaria, Servisu Investigasaun Kriminál Nasionál (SIKN), Polisia Nasionál Timor-Leste (PNTL), deskobre kazu droga ho tipu sabu-sabu kilogram 3,253 ne’ebé autoridade seguransa aprende (foti) husi Suspeitu CBM iha Aeroportu Internasionál Nicolau Lobato iha sekuénsia ho kazu droga anteriór ne’ebé kazál Timoroan lori ba Atambua-Indonézia iha loron 29 maiu 2019.
Notísia Relevante : Autoridade Detein Timoroan Lori Sabu-Sabu Kilograma 3,253
“Ita fiar katak kazu ida ne’e iha relasaun ho kazu ne’ebé ita atende iha tinan kotuk, se ita lembra karik iha kazu pil estasi musan hamutuk 4.874 lori ba Indonézia iha relasaun ho ema ne’ebé manda mai,” hateten Inspetór Xefe Servisu Investigasaun Kriminál Nasionál (SIKN), Mozinho Correia ba jornalista liuhusi konferénsia imprensa, ohin, iha Kuartél Jerál PNTL Caicoli, Dili.
Polisia sei halo investigasaun kle’an ba suspeitu CBM no buka tuir suspeitu ne’ebé haruka droga husi Nijéria mai Timor-Leste, nune’e mós koordena ho Badan Narkotika Nasionál (BNN) Repúblika Indonézia hodi deteta autór sira iha Indonézia.
PNTL apela mós ba juventude sira atu kuidadu, tanba ohin loron autór droga sira uza joven feto-mane sai hanesan objetivu hodi transporta droga mai Timor-Leste.
Notísia Relevante : Indonézia Seidauk Fó Informasaun Kona-ba Investigasaun Kazál Timoroan Lori Droga
“Kuidadu ema uza joven sira ne’ebé inosente la iha koñesimentu ba modus ai-moruk sira ne’e sai vítima, se ita la koñese ema labele simu sasán sira ne’e,” nia apela.
Autoridade seguransa deteta droga haruka husi Nijéria mai Timor-Leste via Ajénsia DHL iha too Aeroportu Internasionál Nicolau Lobato loron 6 Janeiru 2020 ho Aviaun Citilink.
Droga ne’e hatama ho modus tau kompresór AC (Air Conditioner) karreta nian fui ho xumbu alumíniu ne’ebé solda metin.
Notísia Relevante : Xanana-Jokowi Bele Buka Solusaun Ba Kazál Timoroan Lori Droga
Suspeitu CMB servisu iha restaurante ida Timor Plaza hanesan resepsionista maka ba foti pakote pesa kompresór ne’e iha Aeroportu.
Inspetór Xefe Mozinho rekoñese, antes ne’e, fulan outubru 2019 suspeitu simu droga ho modus hanesan mós haruka ba Atambua Indonézia no parte autoridade la konsege deteta, tanba menus rekursu no ekipamentu.
“Ita rekoñese ida ne’e hanesan modus foun ida para ita tau atensaun atu evita sasán sira ne’e tenke halo kontrola másimu,” nia hatete.
Notísia Relevante : Embaixadór Alberto Carlos Vizita Kazál Timoroan iha POLRES Belu
Tuir lei, bainhira suspeitu ida lori droga ho kuantidade boot ne’ebé kalkula fó prezuiju ba estadu sei ameasa tama kadeia tinan 25.
Notísia Relevante : Governu Presiza Hatudu Seriedade Hodi Próteze Kazál Timoroan Lori Droga
Jornalista : Eugénio Pereira
Editór : Francisco Simões
