Komandante Polisia Na’in Rua Simu tán Pose

DILI, 17 janeiru 2020 (TATOLI)-Komisáriu Polisia Nasionál Timor-Leste (PNTL) Faustino da Costa, sesta ohin, fó tan pose ba komandante polisia Munisípiu Manufahi foun, Superintendente, Damião da Silva Correia no Komandante Munisípiu Manatuto, Julia Gama.
Iha tinan 2019, Komisáriu PNTL ne’e fó ona pose ba Komandante na’in lima no ohin fó tan pose ba na’in rua hodi hahú kompleta estrutura PNTL hahú nasionál, munisípiu inklui RAEOA durante ninia mandatu.
Komisáriu Faustino da Costa, iha ninia deskursu husu ba emposadu na’in-rua atu asume kargu ne’e ho responsabilidade tuir lei no orden hodi hametin liután estabilidade iha Munisípiu rua ne’e.
Notísia Relevante :Komisáriu Faustino Fó Pose Ba Komandante Na’in Lima
“Seguransa responsabilidade ita-nian, no ita nia komunidade sira hotu, tanba ne’e ita hotu servisu hamutuk oinsá hametin ita-nia estabilidade,”katak, Komandante PNTL, Komisáriu Faustino da Costa, iha Caicoli, Dili,ohin.
Ba komandante foun na’in-rua, nia suzere atu nafatin kria liña koordenasaun servisu ho autoridade lokál, veteranu no mós povu hodi buka rezolve kualkér konflitu iha munisípiu.
Notísia Relevante :Komandu PNTL Fó Pose ba Komandante Na’in Ualu
Iha okaziaun ne’e, Komisáriu PNTL aproveita hodi apela ba Komandante Munisípiu no ajente sira hotu atu evita lori arma no halo agresaun fíziku hasoru komunidade bainhira halo atuasaun ba problema, maibé buka atua ho profesionál no dixiplina tuir lei no orden.
Notísia Relevante :Komisáriu Faustino Dezafia Komandante Armando Lori Dili Sai Hosi Konflitu
“Husu mós ba komandu sira kontinua halo kontrolu masimu ba movimentu transporte públiku sira tenke kumpre regras sinaís tránzitu nian hodi evita asidente trafégu,”nia hatutan.

Iha biban hanesan, Komandante PNTL foun Munisipiu Manatuto, Superintendente, Julia Gama, hateten prontu asume kna’ar no responsabilidade ne’e, tanba antes ne’e nia lidera ona PNTL munisípiu Manufahi durante fulan-lima.
“Ha’u sei kontinua hala’o knaar ho di’ak reprezenta komandu jerál para kopera ho autoridade lokál para ami bele servisu hamutuk, ami bele lori misaun dame ba povu,”Julia, promete.
Notísia Relevante :KomJer Foun Deklara Tinan Ne’e Nu’udar Mudansa Ba PNTL
Durante ninia mandatu iha Manufahi estabelese ona koperasaun servisu ida di’ak ho autoridade lokál, veteranu ho komunidade hodi redús númeru krime iha terenu.
Tuir relatóriu iha 2019, PNTL Manufahi rejista kazu krime hamutuk 46, kazu violénsia doméstika hamutuk neen, kazu asaltu malu entre joven sira no kazu seluk tan.
Jornalista : Eugénio Pereira
Editór : Francisco Simões

