DILI, 20 janeiru 2020 (TATOLI) – Tribunal Distritál Dili (TDD) liuhusi audiénsia primeiru interrogatóriu, aplika pena prizaun preventiva ba arguido JJ tanba lori rama ambon.
Iha loron 14 janeiru 2020, tuku 18:45 Otl, iha Bairru Ai-Lorok Laran, Dili, Polisia detein arguido JJ tanba lori hela rama ambon. Maske nune’e, arguido iha nia depoimentu deklara katak, rama ambon ne’e la’ós ninian, maibé nia foti husi grupu balun ne’ebé halo asaltu ba nia rezidénsia. Tanba ne’e, nia lori katana duni grupu ne’e no grupu ne’e duni mak soe hela rama ambon hodi nia foti tutan.
“Iha arguido nia depoimentu katak rama ambon la’ós ninian, maibé nia foti iha dalan bainhira nia lori katana duni grupu ne’ebé halo asaltu ba nia rezidénsia iha Maloa,” informa Defeza arguido JJ nian, Germano Guterres Ramos via mensajen WhatsApp, ohin, hodi responde Ajénsia TATOLI.
Ba prosesu ne’ebé prezide husi Juiz Singular, Antonio Fonseca ne’e, defeza nia la simu no nia parte sei rekorre ba desizaun primeira instánsia. Iha audiénsia ne’e, Ministériu Públiku reprezenta husi Prokuradór Nelson de Carvalho.
Jornalista : Domingos Piedade Freitas
Editór : Francisco Simões
