DILI, 20 janeiru 2020 (TATOLI) – Ministériu Públiku husu ba Tribunal Distritál Dili (TDD) atu alega pena multa ba arguido MJCR nu’udar funsionáriu públiku ne’ebé asume kargu xefia iha Ministériu Turizmu Komérsiu no Indústria (MTCI-sigla portugés).
Notísia Relevante : Uza Karreta Estadu Iha Domingu, Tribunál Aplika Multa $360 Ba Arguido
Alegasaun MP nian ne’e fundamenta ba aktu arguido MJCR ne’ebé utiliza patrimóniu Estadu nian fora husi oras servisu ne’ebé ekipa konjunta halo apreensaun iha Dili iha Sábadu, 25 maiu 2019, tuku 11:45 Otl.
Arguido MJCR ne’ebé okupa kargu xefia iha MTCI simu karreta ho marka Land Cruiser Prado, ho númeru matrikula 05-802G atu apoiu ba servisu Estadu nian. Maibé, momentu ne’ebá, ekipa operasaun konjunta, kompostu husi Komisaun Anti Korrupsaun (KAK), Polisia Nasional Timor-Leste (PNTL), Diresaun Nasional Patrimóniu Estadu (DNPE) ho Diresaun Nasional Transporte no Terrestre (DNTT) halo apreensaun iha area Mandarin, Dili, tanba utiliza karreta Estadu iha loron feriadu no la aprezenta karta autorizasaun husi superior.
Notísia Relevante : KFP Sei La Tolera Pesoál Uza Karreta Estadu Tula Família Iha Loron Feriadu
Arguido halo aktu ho livre no vontade rasik hodi aproveita patrimóniu estadu sirkula iha loron feriadu, la iha lisensa no hatene katak ninia hahalok kontra dekretu lei ba utilizasaun veíkulu estadu nian.
Ho hahalok sira nee, arguido MJCRL nu’udar autór material ba forma konsumada ba krime pekulatu ba uzu ne’ebé previstu no punidu iha artigu 296 bele komarka tinan rua husi kódigu penal Timor-Leste.
“Ha’u atu lori dokumentu ne’ebé mak atu ba imprime iha Duta Xerox, dokumentu mesak mak iha karreta laran. Ha’u la tula ema ruma inklui mós família. Lei fó dalan atu lori karreta estadu no la presiza auto desizaun tanba ha’u diretór,” afirma arguido iha audiénsia julgamentu iha TDD, ohin.
Notiísia Relevante : Uza Motor Estadu iha Domingu, MP Solisita ba Tribunal Aplika Pena Prizaun Fulan Neen
Iha alegasaun MP nian, husu Tribunal aplika pena ne’ebé mak pertinente mak pena multa no tasa diária $100,00 ho durasaun loron 10 duke pena prizaun. Tanba, arguido iha orsamentu sufisiente hodi selu multa ba ninia aktu. Maibé, iha alegasaun husi Defeza, katak arguido uza karreta ho objetivu mak atu hala’o servisu estadu nian tuir pedidu Prezidente Rejiaun Administrativa Espesiál Oe-Cusse Ambeno (RAEOA), atu ba halo divulgasaun informasaun iha Oe-Cusse.
“Ha’u hanoin karreta laran laiha ema ida no mai mesak no la tula buat ruma tanba nee mak husu atu aplika pena adekuadu atu absolve husi desizaun husi primeiru instánsia,” hateten Germano Guterres nu’udar Defeza ba arguido.
Audiénsia julgamentu ne’ebé prezide husi Juiz Afonso Carmona no Ministériu Públiku reprezenta husi Prokuradór Rogério Viegas ne’e, adia fali ba loron 28 janeiru 2020, tuku 16: 45 Otl, hodi rona desizaun final.
Jornalista : Domingos Piedade Freitas
Editór : Francisco Simões
