DILI, 23 janeiru 2020 (TATOLI)-Tuir dadus provizóriu hosi Sekretária Estadu Protesaun Sivíl (SEPS) relata família 240 hosi Suku Madohi no Comoro maka ninia sasán hetan estragu tanba afeta hosi inundasaun bee tama sira-nia uma.
Diretór Nasionál Jestaun Risku Dezastre Naturaís, Agostino Gomes de Jesus, informa, tuir relatóriu verifikasaun hosi ekipa SEPS rejista família 197 iha Aldeia Terra-Santa, Suku Madohi, família 42 iha Bairru Golgota, no família uma-ka’in ida iha Aldeia 04 Setembru ,Suku Comoro.
Notísia Relevante:Família 200-resin iha Tasi-tolu Afetadu ba Inundasaun
“Sasán uma laran kuaze estragu hotu,” informa Agostino Gomes de Jesus, ba Agência TATOLI, ohin, iha Kazerna Bombeiru Kampung-Baru, Comoro, Dili.
Sasán ne’ebé nia parte identifika hetan estragu hanesan TV, Jelera no sásan uma-laran seluk tan.
Notísia Relevante:IJE, EDTL, DNAS no Bombeiru Foti Solusaun Urjente ba Inundasaun iha Tasitolu
Ohin mós SEPS hamutuk ho liña ministeriál, ajénsia internasionál no nasionál halo ona enkontru koordenasaun hodi haree planu evakuasaun no distrbuisaun apoiu emerjénsia sira ba komunidade afetadu.
Tuir planu, kinta aban (24/01/2020), governu sei hahú distribui apoiu emerjénsia ba vítima inundasaun iha Tasi-Tolu. Apoiu emerjénsia ne’e hanesan foos, mina, sabaun no seluk tan.
Governu Evakua Vítima Inundasaun
Governu liuhosi Sekretária Estadu Protesaun Sivíl (SEPS), ohin, evakua ona ema na’in 77 ne’ebé afetadu hosi inundasaun Tasi-Tolu hodi hela provizóriu iha Kazerna Bombeiru Malinamuk Kampung-Baru no Dom Bosco Comoro, Dili.
Notísia Relevante:SEPS Hala’o Verifikasaun ba Vítima Inundasaun Kuarentena
“Ita hala’o ona evakusaun ba familia uma-kain 20 ho ema na’in 77 ba fatin dignu no balun dadaun iha hela prosesu evakuasaun tan,” dehan Diretór Nasionál Jestaun Risku Dezástre Agostino Gosme de Jesus.
Evakuasaun ne’e atu garante seguru ba vítima sira hodi evita atu mosu tan kazu hanesan iha semana ida ne’e. Komunidade sira sei fila-fali ba sira-nia uma bainhira bee nalihun menus ona.
Tuir observasaun TATOLI, iha fatin evakuasaun provizóriu ne’e nota, ekipa médiku hosi sentru saúde Comoro fó kedas tratamentu sáude ba komunidade afetadu.
Jornalista : Nelson de Sousa
Editór : Francisco Simões
