KRAM Sei Aplika Koima ba Ema Ne'ebé Hakerek Liafuan La Edukativu iha Públiku
DILI, 24 janeiru 2020 (TATOLI)-Komisaun Reguladóra Arte Marsiál (KRAM) sei aplika koima ba ema ne’ebé hakerek liafuan la edukativu iha fatin públiku.
Notísia Relevante : KRAM Rekomenda Labele Reativa Arte Marsiál
Iha tinan kotuk, KRAM koopera ho autoridade lokál no koordena ho Polisia Nasional Timor-Leste (PNTL), inklui FALINTIL-Forsa Defeza Timor-Leste (F-FDTL) halo ezersísiu boot ida hodi hamoos lia fuan la edukativu sira ne’ebé marka iha parede sira iha fatin públiku. Maibé, la liu fulan de’it, ema balun iha bairru-bairru hakerek fali de’it lia fuan sira ne’e iha parede sira iha públiku.
Prezidente KRAM, Carolina Octávia Guterres Pereira, hateten, KRAM sei husu apoiu ba Sekretaria Estadu Juventude no Desportu (SEJD) atu bele halo deliberasaun ida hodi aplika koima ba ema ne’ebé riska no hakerek liafuan la edukativu iha parede no fatin públiku.
“Bainhira SEJD aprova ona proposta ami nian ne’e, maka ami sei mobiliza forsa hotu hodi haree sasán sira ne’e atu bele aplika koima ba ema sira gosta hakerek liafuan la edukativu iha parede sira iha públiku,” afirma Carolina Octávia Guterres Pereira, ba Ajénsia TATOLI iha nia servisu fatin, Dili.
Notísia Relevante : Dili Livre Hosi Publisidade La Edukativu, Moos no Seguru
Prezidente KRAM hatete presiza ema hotu nia kontribuisaun liuliu juventude sira atu bele armoniza situasaun hakmatek no pás iha Dili laran ba Timor latan tomak.
“Hahalok la edukativu ne’e tenke hapara ho regra rigorozu,” afirma Carolina.
KRAM nia mekanizmu atu halo mak prepara diretiva no servisu ho jurídiku nune’e oinsá mak bele prodús koima ninian ho razaun atu fó informasaun ba parte relevante para bele prevene ka asegura sidadaun ne’ebé kontinua hatudu hahalok ka publisidade la edukativu.
“Ami mós prepara hela diretiva ida ba aplika koima ninian bazeia lei 5 artigu 28 ko’alia kona-ba ordenasaun sira. Koima ne’ebé aplika entre $50,00-500,00 tuir ninia karakter no pezu ne’ebé mak iha,” Carolina afirma.
Notísia Relevante : Komisaun G Halo Audiénsia Ho SEJD Kona-ba Atividade KRAM
Lei nu.10/2018 ko’alia kona-ba estabelesimentu KRAM iha Timor-Leste ne’ebé hetan revogasaun husi lei nu.5/2017 kona-ba rejime jurídiku prátika arte rituais no arte marsiál nian no mós rama ambon nian.
KRAM nia servisu mak atu fó paresér no kapasitasaun klube ka sentru sira ne’ebé mak relasaun ho natureza arte marsiál nian. Nune’e atu kontrola monitorizasaun no fiskalizasaun ba sentru klube sira hotu ne’ebé eziste hela.
Jornalista : Osória Marques
Editór : Francisco Simões
