DILI, 27 janeiru 2020 (TATOLI)-Ekipa Saneamentu Munisípiu Dili dadaun ne’e hamoos hela fo’er no rai ne’ebé mout iha valeta área Tasi-Tolu ho ekipamentu manuál hanesan enxada, ai-suak no seluk tan hafoin akontese inundasaun iha semana kotuk.
Maske iha semana kotuk, Ministru Obra Públika (MOP), Salvador Eugénio Soares dos Reis Pires, no Vise Ministru Obra Públika, Nicolau Lino Freitas Belo, fó ona orientasaun ba ekipa Institutu Jestaun Ekipamentu (IJE), no Diresaun Jerál MOP atu koloka ekipamentu pezada hodi suru rai ne’ebé maka nakonu iha valeta laran, maibé to’o segunda ohin la-realiza.
Notísia Relevante:Ekipa Hamoos Valeta iha Tasi-Tolu Paradu
Tuir Responsavél Ekipa Saneamentu Munisípiu Dili, Antonino Amaral, nia parte hahú hamoos valeta iha área Tasi-Tolu Dili, iha loron 22 fulan-janeiru hafoin simu orientasaun hosi Autoridade Munisípiu Dili.
Notísia Relevante:IJE, EDTL, DNAS no Bombeiru Foti Solusaun Urjente ba Inundasaun iha Tasitolu
“Tuir loloos ne’e ami hamoos hotu ona maibé horiseik (26/01/2020) no horibainrua(25/01/2020) udan fali de’it hodi lori rai taka valeta entaun ami kontinua hamoos no suru rai iha valeta laran hodi labele mosu inundasaun tan,”katak Antonino Amaral, ba TATOLI iha Tasi-Tolu, ohin.
Notísia Relevante:Família 200-resin iha Tasi-tolu Afetadu ba Inundasaun
Nia dehan, problema uja ekipamentu manuál hanesan enxada, ai-suak maka afeta tebes ba sira atu suru rai no tahu dodok sira iha valeta ho lalais.
“Ohin ami seidauk bele suru fo’er no tahu dodok iha valeta laran hotu tanba ami laiha alat berat ne’ebé mak ajuda ami hodi hamoos,”nia hatutan.
Jornalista : Osória Marques
Editór : Francisco Simões
