Família Tolu iha Tasi-Tolu Seidauk Simu Apoiu Emerjénsia

DILI, 28 janeiru 2020 (TATOLI)-Família tolu ne’ebé afetadu hosi inundasaun bee tama sira-nia uma iha Tasi-Tolu, to’o tersa ohin seidauk simu apoiu emerjénsia hosi Sekretáriu Protesaun Sivíl tanba naran dupla iha lista apoiu.
Segundu Komandante Bombeiru, Kampung-Baru Comoro, Munisípiu Dili, Diego de Araújo, hateten dadaun ne’e nia parte verifika hela lista família tolu ne’e hodi hetan ona apoiu hosi governu.
Notísia Relevante :Família 13 Re-aloka ba Sira-Nia Uma

“Maibé ami sei halo konfimasaun ba naran iha lista bombeiru nian ho lista momentu rejistu iha sira-nia hela fatin. Parese iha tempu besik orsida ka aban hanesan sira simu apoiu ona. Tanba sira-nia sasan apoiu iha ona bombeiru,”katak Diego ba TATOLI iha ninia servisu fatin Comoro, ohin.
Notísia Relevante :Dadus SEPS: Sasán Família 240 Hetan Estragu
Iha parte seluk nia dehan, uma-kain 17 ne’ebé evakua antes ne’e hodi hela provizóriu iha Kazerna Bombeiru, no Dom Bosco Comoro iha segunda horiseik mazumenus tuku 03:00 lokoraik re-aloka ona ba sira nia hela fatin iha BTN I no III Tasi-Tolu.
“Ami evakua komunidade afetadu inundasaun iha área Tasi-tolu, BTN 1 no BTN3 mai iha Bombeiru GOI Comoro nian durante loron haat (23-27/01/2020) hodi ami bele fó asisténsia ba sira hanesan fó ajudu emerjénsia husi Governu no hetan aimoruk husi médiku sira,”nia esplika.
Notísia Relevante :Família 200-resin iha Tasi-tolu Afetadu ba Inundasaun
Apoiu emerjénsia hanesan foos, mina, ikan lata, supermie no la’ós hahan mak biti, sabaun balde no seluk tan maka SEPS fó ba vítima sira.
Jornalista : Osória Marques
Editór : Francisco Simões

