DILI, 04 fevereiru 2020 (TATOLI)- Ho desizaun Governu nian sobu baraka hamutuk 70-resin iha Kampu Alor, Dili, no muda obrigatóriu negosiante Indonéziu sira sai husi fatin negósiu iha Kampu Alor ba Golgota Plaza, lori rahun di’ak ba polítika Governu nian, maibé Xefe Suku Kampu Alor, Alcina Carvalho Santos, konsidera, desizaun ne’e fó kontribuisaun negativa ba kreximentu ekonomia komunidade sira nian ho hamosu dezempregu foun ba juventude sira iha Kampu Alor.
Notisísia Relevante : Sobu Baraka Kampu Alor, Povu La Kontente ho Prezidente Autoridade
Xefe Suku Alcina Carvalho Santos, hateten, uluk negosiante Indonéziu sira hala’o atividade negósiu iha Kampu Alor, fó servisu ba juventude sira no komunidade sira hetan lukru natoon hodi sustenta sira nia nesesidade husi baraka ne’ebé sira harii hodi fó aluga ba negosiante sira.
Ohin loron, Xefe Suku Alcina hateten, ema sira ne’e lakon rendimentu no juventude sira lubuk feto no mane lakon servisu. Tanba desizaun Governu nian muda obrigatóriu negosiante Indonéziu sira iha loron 2 outubru 2019, ba fali Golgota Plaza, Comoro, Dili.
Nia dehan, atividade negósiu iha kampu Alor molok muda ba Golgota Plaza, absorve juventude 400-resin mak servisu no família lubuk mak hetan rendimentu husi baraka 70-resin ne’e. tanba ne’e, Xefe Suku sente triste liu tan, governu promote atu fó kompensasaun ba vítima sira, maibé to’o agora la realiza hodi ezekuta obrigatóriu sobu hotu baraka sira ne’e.
“Ha’u sente triste tebes, tanba ha’u ukun povu la susesu, tanba governu hasai tiha negosiante Indonézia dehan fatin ne’e sei husik mamuk, depois desizaun mai dehan atu sobu no la fó kompensasaun ruma ba ha’u nia povu. Agora ha’u nia povu kuaze 400-resin tenke lakon servisu hodi aumenta tan problema dezempregu,” afirma Xefe Suku Alcina hodi responde Ajénsia TATOLI, ohin, iha sede Suku Kampu Alor, Dili.
“Ha’u la hatene Governu uza lei artigu númeru hira maka dehan katak, povu Kampu Alor ne’ebé harii baraka iha rai privadu mós dehan labele halo negósiu. Tanbasá?,”.
Alcina lamenta promesa lider polítiku sira atu ukun nasaun ne’e tenke liberta uluk povu sai husi mukit, maibé ohin loron, kaer tiha ukun lider sosa uluk karreta no hadi’a sira nia vida moris, maibé haluha tiha povu nia moris.
Jornalista : Eugénio Pereira
Editór : Francisco Simões
