AILEU, 05 fevereiru 2020 (TATOLI) – World Vision Timor-Leste lori to’os-na’in ka partisipante sira iha eventu aprendizajen kona-ba Agrikultór Maneja Rejenerasaun Naturál (FMRN) hodi vizita Munisípiu Aileu atu haree diretamente ai sira ne’ebé to’os-na’in sira kuda durante ne’e liuhusi tulun World Vision nian.
Jerente World Vision Munisípiu Aileu, Emelita da Cruz, hateten atividade ne’e kontinuasaun hodi lori agrikultór sira hosi Munisípiu Baukau, Manatuto, Covalima, Bobonaro no Aileu rasik hodi halibur hanoin hamutuk kona-ba prátika sira ne’ebé durante ne’e sira hala’o ona iha sira-nia rain.
“Agora, issue ne’ebé famozu maka mudansa klimátika, ne’ebé liuhusi to’os-na’in sira esforsu iha nivel família, ita imajina de’it família ida hadi’a ninia uma hun hodi kuda tan ai-oan foun ho ai sira ne’ebé bele uza ba ai-han, ba fa’an, ne’e bele kontribui ba ona ita-nia ambiente”, Emelita katak iha suku Fahiria, Postu Administrativu Aileu Vila, Munisípiu Aileu, ohin.
Nia argumenta bainhira ambiente bele fó oksijéniu ba ema maka komunidade sira tenke hahú kuda no konserva ai agora no ba jerasaun tuirmai.
World Vision apoia ona Agrikultór Munisípiu Aileu antes ne’e iha Postu Administrativu haat (Aileu Vila, Lekidoe, Remexiu, no Laulara), maibé hahú iha 2017 to’o mai 2019, World Vision foku iha Postu Administrativu ida ba suku sira (hanesan; Seloi Kraik, Liurai, Seloi Malere, Fahiria).
Diretór Servisu Agrikultura Munisípiu Aileu, Gallieni Sebastião Franklin da Costa Galhos, agradese tebes ba World Vision ne’ebé sai hanesan parseiru Governu nian.
“Governu apoia tebes atividade World Vision nian no sira sempre lori Agrikultór mai prátika iha Aileu. Kona-ba área florestál nia intervensaun barak ona, ami serbisu hamutuk ho parseiru hodi halo reflorestaun ba ektare 20, no ba oin ami sei kontinua”, dehan.
Agrikultór hosi Manatuto, Postu Administrativu Natarbora hanesan mós partisipante, Câncio da Costa, apresia tebes ho programa World Vision nian tanba lori agrikultór sira hosi munisípiu seluk bá haree to’os iha Aileu.
“Nune’e, ami sira mak haree ne’e bele aplika filafali iha ami-nia rain”, afirma.
Câncio rekomenda ba agrikultór sira iha Aileu atu ida-idak kuda ninia ai-oan, bainhira atu tesi ai hodi uza ba nesesidade ou fa’an karik labele hamosu problema, tanba kuda ai-oan forma grupu maka aban bainrua sei hamosu problema kuandu ai ne’ebé kuda komesa fó ona benefísiu.
“Vantajen kona-ba kuda ai maka nu’udar agrikultór boot tebes tanba aban bainrua ami bele uza ai sira ne’ebé iha fa’an fali, hodi hetan osan no bele halo uma”.
Hafoin vizita tiha to’os iha suku Fahiria, Aldeia Fahiria, Postu Administrativu Aileu Vila, ekipa bá vizita fali iha suku Liurai, Aldeia Laclo, Munisípiu Aileu.
Notísia relevante : World Vision Halibur Autór Prinsipál Floresta Maneja Rejenerasaun Naturál
Jornalista : Antónia Gusmão
Editora : Maria Auxiliadora
