DILI, 18 Fevereiru 2020 (TATOLI)-Kazu taa malu ne’ebé akontese iha Aldeia Hali Dolar, Suku Hera, Postu Administrativu Kristu Rei, Munisípiu Dili, sábadu kalan (15/02/2020), rezulta vítima na’in-rua; AL no MGDR hetan kanek maka’as.
Komandante PNTL Munisípiu Dili, Superintendente Xefe Armando Monteiro dehan, hafoin kazu ne’e akontese, parte Polísia Eskuadra, Kristu Rei, no Postu Hera, hetan apoiu husi Forsa Komponente Navál F-FDTL no populasaun sira evakua kedas vítima na’in-rua ba Hospital Nacional Guido Valadares (HNGV).
Iha kalan ne’e kedas, autoridade seguransa sira mós halo operasaun hodi kaptura suspeitu na’in-ualu (8) ho inisiál MS, AP, AR, MDS, CDADN, JPDS, AS no MS.
“Kalan ne’e kedas ami kaptura ona suspeitu na’in-ualu (8) ne’ebé envolve iha tentativa omisídiu ne’e,” informa Komandante Armando Monteiro ba jornalista, ohin, iha Komandu Polísia, Caicoli, Dili.
Motivu husi kazu ne’e tanba ódiu vingansa ba problema antigu iha setembru 2018 ne’ebé rezulta vítima ida mate. Tanba problema la konsege rezolve, ikus mai parte husi família rua ne’ebé halo problema kontinua haksesuk malu hodi hamosu problema taa malu akontese dala ida tan.
Suspeitu na’in-ualu (8) daudaun ne’e detein hela iha sela PNTL Caicoli Dili hodi submete ba investigasaun molok lori ba aprezenta iha Ministériu Públiku.
Jornalista : Eugénio Pereira
Editór : Francisco Simões
