DILI, 17 fevereiru 2020 (TATOLI)–Governu Timor-Leste liuhosi Ministériu Negósiu Estranjeiru no Kooperasaun hamutuk ho liña ministeriál iha tinan 2019 liubá konsege responde ona pergunta hamutuk 60 hosi Sekretariadu Organizasaun Sudeste Aziátiku (The Assosiation Southeast Asian Nation) kona-ba pilár sósiu no kultura.
Diretóra Jerál Asuntu ASEAN, Ministériu Negósiu Estranjeiru no Kooperasaun (MNEK), Milena Rangel hateten iha fulan-novembru 2019 konsege responde pergunta hirak ne’ebé liga ho pilár sósiu-kultura liuliu iha área edukasaun, saúde, jéneru, direitu labarik, ambientál no seluk tan.
Notísia Relevante :Nasaun Membru ASEAN Rekoñese Progresu Timor-Leste
“Iha novembru 2019 liubá Diretór Jerál Asuntu ASEAN hala’o vízita servisu ba iha Sekretariadu ASEAN iha Jakarta no konsege simu kedas pergunta hamutuk 60 no MNEK lidera grupu traballu ba komunidade ASEAN Sósiu-Kulturál (ASCC) komesa halo konsulta ho ministériu relevante hotu-hotu hodi responde pergunta 60 ne’e,” dehan Milena ba TATOLI, via whatsapp, segunda ne’e.
Notísia Relevante :MNEK Husu Timoroan Hotu Kontribui Adezaun TL Ba ASEAN
Mezmu Timor-Leste responde ona pergunta hirak-ne’e maibé hosi parte AZEAN rasik seidauk públika ninia resultadu atu nune’e bele apoiu Governu hodi halo preparasaun di’ak liután ba adezaun Timor-Leste iha Organizasaun Sudeste Áziatiku ne’e.
“En jerál Timor -Leste iha kondiaun bázika atu asegura implementasaun programa hosi parte pilár ida-ne’e. Timor-Leste responde tuir pergunta ne’ebé mak ita simu tanba ita laiha informasaun kona-ba indikadór sira saida mak uza atu tetu Timor Leste nia adezaun,” tenik tan.
Tuir planu iha fulan-maiu 2020, misaun esploratóriu ka fact finding mission sei hala’o vizita mai Timor-Leste hodi haree besik liután kona-ba nasaun ne’e ninia preparasaun hodi adere ba ASEAN.
Jornalista: Hortencio Sanchez
Editór : Agapito dos Santos
