Aban, PD Realiza Konferénsia Nasionál

DILI, 19 fevereiru 2020 (TATOLI)—Sekretáriu Jerál Partidu Demokrátiku, António “Kalohan” da Conceição informa, aban (20/02), Partidu Demokrátiku (PD) sei realiza konferénsia nasionál hodi tetu opsaun ne’ebé mai hosi CNRT, FRETILIN, PLP no KHUNTO molok envolve iha koligasaun foun ruma.
Iha konferénsia ne’e, nia hatutan, dirijente Partidu Demokrátiku sei rona kuadru no estrutura Partidu Demokrátiku husi munisípiu hotu mak sei tetu opsaun polítika ne’ebé mai husi partidu hirak-ne’e.
“Aban lorokraik, PD hahú halo konferénsia nasionál Partidu Demokrátiku ninian iha ne’e (Sede PD), atubele tetu opsaun sira ne’ebé mai hosi CNRT, hosi PLP para ami tetu oin nusá maka PD bele hamriik,” António “Kalohan” ba jornalista sira iha sede PD, Kolmera, kuarta ne’e.
Kalohan hatutan, PD no FRETILIN halo diálogu nafatin atu hatudu ba sira katak durante ne’e tuur hela iha kantu opozisaun nian.
“Ami nafatin opozisaun hamutuk ho FRETILIN. Maibé, ba nasaun, ami hakarak dehan katak ami mai hatudu nafatin responsabilidade ba vida polítika nasaun nian,” nia dehan.
Notísia Relevante: Xanana Gusmão Fó Garantia Ba Partidu Demokrátiku
Notísia Relevante: PLP-PD Hahú Kria Konfiansa Molok Forma Konfigurasaun
Notísia Relevante: PD Buka Entendimentu FRETILIN ba Situasaun Polítika Atuál
Notísia Relevante: PD Buka Entendimentu FRETILIN ba Situasaun Polítika Atuál
Jornalista : Evaristo Soares Martins
Editór : Cancio Ximenes

