DILI, 24 fevereiru 2020 (TATOLI) – Prezidente Autoridade Aviasaun Sivíl Timor-Leste (AACTL-sigla portugés), Ana Rosalia Ximenes Varela, hateten parte AACTL reativa hikas fali operasaun Aviaun Aero Dili tanba konsidera laiha problema ho aviaun sira seluk.
Iha loron 20 fevereiru 2019, Aviaun Aero Dili ho tipu Cessna 172, númeru rejistu 4W-AAA, dirasaun Suai mai Dili, monu iha Liquiçá.
“Sim iha tinan hirak liubá ami fó duni suspesaun ba Aviaun Aero Dili tanba liga ba asidente ne’ebé aviaun ne’e hetan iha tinan kotuk, maibé agora ami reativa filafali operasaun aviaun ne’e tanba bazeia ba ami-nia haree katak Aviaun Aero Dili só aviaun ida de’it maka hetan asidente la’ós aviaun hotu”, nia informa ba Agência TATOLI via telefone, segunda ne’e.
Notísia Relevante: Aviaun Aéru Dili Monu Iha Likisa
Nia dehan, daudaun ne’e Aviaun Aero Dili iha rua, ida maka hetan asidente iha Liquiçá no iha ida tan, tanba ne’e husi parte kompañia Aero Dili mak husu ACCTL atu reativa hikas operasaun.
“Kompañia Aero Dili rasik maka mai husu ami atu reativa hikas sira nia lisensa operasaun, tanba kompañia ne’e aviaun ida de’it maka hetan asidente, maibé ida seluk lae. Tanba ne’e foin daudaun ne’e ami reativa filafali sira nia lisensa operasaun. Bainhira sira husu maka ami la reativa ne’e ami sala”, dehan Ana Rosalia.
Nia realsa, nu’udar autoridade reguladora, AACTL halo ona inspesaun ba aviaun ne’ebé la hetan asidente molok autoriza halo operasaun.
“Ami halo hotu ona inspesaun ba aviaun ida seluk husi Kompañia Aero Dili ne’ebé atu halo operasaun, aviaun ne’e nia kondisaun di’ak no prontu halo opersaun filafali”, nia akresenta.
Nune’e mós, Xefe Investigasaun ba asidente Aviaun Aero Dili, husi AACTL, Guilhermino Camões Sarmento, reforsa reativisaun lisensa operasaun ne’e parte AACTL mak halo no la iha problema no tuir duni dalan legál.
“Ita labele dehan tan de’it aviaun ida monu aviaun sira seluk tuir kedan investigasaun hotu”, nia dehan tan.
Guilhermino Camões informa tan, Aviaun Aero Dili ne’ebé hetan asidente iha tinan kotuk iha Liquiçá sei hein rezultadu investigasaun finál.
“Ha’u hanoin bele reativa fali Aviaun Aero Dili ho operasaun dométika regularmente”, nia realsa.
Jornalista: Natalino Costa
Editora: Julia Chatarina
