DILI, 28 fevereiru 2020 (TATOLI)-Ministériu Saúde hamutuk ho Organizasaun Saúde Mundiál (OMS) to’o sesta (28/02/2020), ohin seidauk identifika pasiente estranjeiru no Timoroan maka dadaun ne’e afetadu ona ba coronavirus.
Ministériu Saúde ho OMS fó sai esteitementu ne’e hodi responde preokupasaun públiku iha Mídia Sosiál katak Sidadaun Vietname ida, oras ne’e halo tratamentu saúde iha Sentru Saúde Formosa tanba hetan infesaun hosi coronavirus.
Notísia Relevante :AA La Deteta Sasan Merkadoria Afetadu ho Coronavirus
“Bazeia ba rezultadu investigasaun, ida ne’e la’os suspeitu kazu ba COVID-19,”esklarese komunikadu imprensa ne’ebé fó sai hosi MS ho OMS iha sira-ninia account Facebook ohin.
Komunikadu ne’e mós esplika sidadaun Vietname ne’e halo viajén mai Timor-Leste ho roo kargu iha loron 12 fulan-fevereiru hosi ninia nasaun orijén no to’o iha Dili iha loron 24 fulan-fevereiru 2020.
Notísia Relevante :OMS Apoiu Ekipamentu Prevensaun Coronavirus ba MS
“Ema ne’e laiha sintoma konsitente ba COVID-19 no agora dadaun individu ne’e iha hela observasaun médiku sira iha roo laran,”tenik komunikadu ne’e.
Tanba ne’e, Ministériu Saúde ho Organizasaun Saúde Mundiál apela ba públiku atu labele pániku ho informasaun ne’ebé espalla iha públiku.
Notísia Relevante :TL Seidauk Sofre Coronavirus no Kondisaun Estudante 17 Saudável
Atu deskobre loloos informasaun ne’e maka, ohin mós Jornalista Agência TATOLI konfirma asuntu ne’e ho médiku no pesoál Saúde sira iha sentru Saúde Formosa maibé sira rejeita informasaun ne’e katak laloos, tanba to’o sexta ohin sira seidauk halo tratamentu saúde ba sidadaun Vietname ne’e.
Jornalista: Felicidade Ximenes
Editór : Agapito dos Santos
