Partidu Polítiku Sira Tenke Sériu Solusiona Inserteza Polítika

DILI, 28 fevereiru 2020 (TATOLI)—Prezidente Parlamentu Nasionál, Arão Noé de Jesus da Costa Amarál hateten, dezenvolvimentu atu la’o ba-oin partidu polítiku sira tenke lalais no sériu fó solusaun ba inserteza polítika iha rai-laran.
Daudaun ne’e, Prezidente Parlamentu Nasionál hatutan, timoroan hotu-hotu preokupadu ho situasaun polítika atuál tanba seidauk iha serteza polítika.
“Ha’u lakohi komenta kona-ba polítika. Maibé, hanesan timoroan preokupa tanba ita moris hela ho inserteza polítika. Presiza solusaun ida ho lalais no sériu atu nune’e bele normaliza fali situasaun, nune’e dezenvolvimentu rai ida-ne’e bele la’o nafatin ba-oin. Preokupasaun ne’e la’ós ha’u-nia de’it maibé ha’u fiar preokupasaun sidadaun tomak Timor-Leste nian,” dehan Prezidente Parlamentu Nasionál, Arão Noé de Jesus, ba jornalista sira iha Parlamentu Nasionál, sesta ne’e.
Nia afirma, prosesu dezenvolvimentu atu la’o lalais partidu polítiku sira tenke buka-malu, nune’e fó solusaun ne’ebé di’ak ho lalais liu.
“Tanba ita hakarak mehi moris di’ak entaun tenke presiza dezenvolvimentu. Dezenvolvimentu atu iha tenke iha serteza polítika ida. Ida-ne’e mak importante,” Prezidente Parlamentu Nasionál ne’e hateten.
Jornalista : Evaristo Soares Martins
Editór : Cancio Ximenes

