DILI, 03 marsu 2020 (TATOLI) – Tribunál Distritál Dili (TDD), segunda (02/03/2020), absolve arguida Jien Li (sidadania Korea) ho Aida da Costa Pinto (Timoroan) ne’ebé foin lalais ne’e envolve iha kazu riska bandeira Repúblika Demokrátika Timor-Leste (RDTL).
Liuhosi prosesu sumáriu iha TDD, juiz singular António Fonseca, deside absolve arguida sira, tanba liafuan ne’ebé riska iha bandeira ne’e hanesan liafuan motivasaun, la’ós ko’alia dezrespeitu símbolu nasionál.
Iha sesta (27/02/2020), iha padaria Portugal, Timor Plaza, tuku 16.00 Otl, Jacinto Guterres, nu’udar sasin hemu hela kafé. Derrepente, nia haree ba meza leten iha hena mean ida ho símbolu fitun ho kór mutin ho nune’e nia besik ba haree hena ne’ebé arguida sira pinta ne’e bandeira nasionál RDTL.
Ho nune’e, sasin komunika kedas ho autoridade polisia Munisípiu Dili hodi hola media tuir lei mak vigora iha Timor-Leste.
Ministériu Públiku (MP) akuza arguida na’in rua ho krime ultraje ba símbolu nasionál ne’ebé previstu iha artigu 206 Kódigu Penál Timor-Leste.
Ministériu Públiku liuhosi Prokuradór António Tavares husu juiz singular António Fonseca, atu aplika pena multa ba arguida sira tuir situasaun no kondisaun arguida sira nian. Tanba arguida sira hatudu la respeita símbolu nasionál.
Câncio Freitas ne’ebé fó asisténsia legal ba arguida sira hatete, liafuan ne’ebé pinta hosi nia kliente iha bandeira ho espresaun no sentimentu hosi arguida Jien Lie ne’ebé antes nu’udar formadór ba lian Koreia iha Timor.
“Liafuan sira ne’e hanesan jestu amizade ida, nune’e parte defeza husu tribunál atu absolve tiha arguida na’in rua hosi krime ne’e, tanba arguida sira rekoñese ona aktu ne’ebé sira halo,” hateten Câncio Freitas.
Rona tiha deklarasaun hosi parte sasin, MP no defeza, TDD deside absolve kazu refere, maibé kontinua fó espasu ba parte Ministériu Públiku durante loron 15 hodi halo análize desizaun tribunál nian bele rekorre fila-fali ba Tribunál Rekursu.
Jornalista : Nelson de Sousa
Editór : Francisco Simões
