DILI, 05 marsu 2020 (TATOLI)-Ajénsia Nasionál Avaliasaun Akreditasaun Akadémika (ANAAA) tuir planu iha tinan 2020 sei halo avaliasaun institusionál ba Institutu Politékniku Betano ho Institutu São João de Brito hodi hetan akreditasaun institusionál tanba ejiste kleur no halo ona graduasaun ba estudante sira.
Diretór Ezekutivu ANAAA, Edmundo Viegas, hateten nia parte husu ona ba instituisaun ensinu superior rua ne’e atu prepara aan hodi hetan avaliasaun hosi ekipa avaliadór sira.
Notísia Relevante :ANAAA Akredita Tan IES Tolu
“Kritéria ANAAA nian kuandu Institutu Ensinu Superiór ida mak realiza ona ninia graduasaun ba estudante sira instituisaun ne’e merese ona atu hetan avaliasaun akreditasaun husi ANAAA,”dehan Edmundo Viegas, ba Agência TATOLI, iha ninia servisu fatin matadouro, segunda (02/03/2020).
Notísia Relevante :ANAAA Sei Avalia Departamentu Pré-Eskolár UNTL Kuandu Iha Ona Graduadu
Nia hatutan ekipa avaliadór sei halo avaliasaun dahuluk ba Institutu São João de Brito depois maka Institutu Politékniku Betano.
Notísia Relevante :UNTL Sei Aprezenta Kursu Haat ba ANAAA
Maibé prosesu avaliasaun sei realiza bainhira ISJB no IPB prepara ona sira-nia relatóriu avaliasaun baseia ba nesesidade.
Notísia Relevante :ANAAA Hein Pedidu Avaliasaun Hosi UNTL
“Ami fó hatene ona ba ISJB katak imi iha ona graduasaun entaun tenke prepara aan atu hetan uluk avaliasaun akreditasaun ba institusional nian, tanba prienxe ona siklu formasaun ida hahú husi simu estudante foun to’o estudante ne’e finaliza kursu ida,”realsa tan.
Jornalista : Tomé Amado
Editór : Agapito dos Santos
