DILI,06 marsu 2020 (TATOLI)-Eis Prezidente Repúblika, José Ramos Horta hateten atu prevene infesaun coronavirus iha Timor-Leste família ida-idak iha obrigasaun atu moris iha ambiente ida moos no seguru.
”Maibé iha ita nia rain ita nia labarik sira nunka fase liman atu han sira halimar rai rahun buat oioin derpenti atu han sira la fase liman,”katak Premiadu nobel ba Dame ne’e durante hatoo deskursu iha programa diseminasaun informasaun hosi Ministériu Saúde kona-ba coronavirus ba Autoridade Lokál no Munisípiu Dili iha Palasiu Sinzas, Caicoli, kinta (05/03/2020).
Notísia Relevante : MS Desimina Informasaun Kona-ba Coronavirus ba Autoridade Lokál
Nia dehan problema falta bee-moos sai difikuldade ba estudante sira atu fase liman ho sabaun iha eskola públika sira iha Territóriu Timor-Leste. Tanba ne’e governu persiza atu resolve problema falta bee-moos.
Timor-Leste persiza prepara aan didi’ak hodi halo prevensaun tanba fronteira direta ho Indonézia ne’ebé maioria Turista vízita iha Bali Indonézia maihosi Azia.
“Turista rihun atus ba atus iha Bali no maioria maihusi Asia tanba ne’e mak perigosu liu ba Timor entaun Indonézia mak iha ona virus timor mós perigu mate tanba kontaktu ba kontaku,”dehan Horta.
Tanba ne’e maka Xefe Suku, Aldeia ho Autoridade Munisípiu mós iha papel iportante atu apoiu governu hodi desimina informasaun ba sidadaun oinsá atu halo prevensaun.
Jornalista : Felicidade Ximenes
Editór : Agapito dos Santos
