DILI, 09 marsu 2020 (TATOLI)- Governu Timor-Leste liuhosi Ministru Defeza no Ministru Interiór, Filomeno da Paixão de Jesus, husu ba komunidade Suku Tibar, Munisípiu Liquiça, atu labele impede polítika governu hodi harii Sentru Izolamentu ba pasiente Coronavirus (COVID-19) iha Community House Limited, Tibar.
Notísia Relevante : Komunidade Tibar Rezeita Harii Fatin Izolamentu ba Pasiente Coronavirus
Ministru Filomeno da Paixão de Jesus, hato’o mensajen ne’e hodi hato’o nia opiniaun ba asaun impedimentu ne’ebé komunidade Tibar halo hasoru Ministra Saúde, Elia dos Reis Amaral ne’ebé ho ekipa saúde domingu (08/03/2020), dezloka ba Tibar hodi prepara fatin izolamentu ba pasiente COVID-19, maibé komunidade Tibar rejeita hodi halo asaun protesta too tuda karreta delegasaun Ministériu Saúde nian.
“Ha’u apela ba populasaun sira atu ita hotu tuur hanoin, ita labele tau sees hodi haree fatin ida definitivu hodi kontribui, tanba estadu hola pozisaun ida hodi koloka fatin tratamentu, tanba Coronavirus ne’e perigozu. Se ita la tau fatin ida di’ak, ema ne’e iha li’ur bele espalla moras ne’e lalais liu ba ema,” Filomeno Paixão hateten.
Iha fatin hanesan, Komandante Jerál PNTL, Komisáriu Faustino da Costa dehan, nia parte orienta ona ekipa PNTL hodi garante nafatin seguransa iha fatin Community House Limited, Tibar.
Biban ne’e, Komandante Interinu PNTL Munisípiu Liquiça, Superintendente Asistente, Luis da Silva, rekoñese, iha domingu (08/03/2020), tuku 19: 00 too tuku 23:00 Otl, komunidade Tibar halo duni asaun blokeia ekipa Ministériu Saúde hodi harii sentru izolamentu ba suspeitu Coronavirus iha Community House Limited, Tibar.
Nia informa, iha asaun ne’e populasaun sira konsege tuda karreta tolu no hasai karreta nia aar, maibé parte PNTL konsege tiru gás lacrimogêneo hodi akalma situasaun.
“Komunidade sira halo asaun protesta makas tanba sira la simu atu governu harii sentru izolamentu ba ema sira ne’ebé sofre Coronavirus,” hateten Superintendente Asistente Luis.
Nia mós rejeita informasaun ne’ebé hateten katak, komunidade tuda rahun Vise Ministra Saúde, Elia nia karreta, ne’e la loos.
Durante halo asaun PNTL mós la halo kapturasaun ba populasaun sira no akompaña nafatin povu hodi simu desizaun governu nian.
Ministériu Saúde hamutuk ho Organizasaun Saúde Mundiál (OMS) halo ona atendimentu ba sidadaun Italianu ida ne’ebé sai suspeitu ba kazu COVID-19 no kontinua halo observasaun ba iha suspeitu nia kondisaun ne’ebé estavel.
Ekipa médiku mós hasai ona rezultadu amostra hosi pasiente refere manda ba Austrália atu halo teste konfirmasaun ba COVID-19.
Jornalista : Eugénio Pereira
Editór : Francisco Simões
