DILI, 9 marsu 2020 (TATOLI)—Bankada Parlamentár Uniaun Demokrátika Timorense no Frente-Mudansa (UDT-FM) laiha problema ho koligasaun anteriór Frente Dezenvolvimentu Demokrátiku (FDD).
Xefe Bankada Parlamentár UDT-FM, Francisco David Xavier Carlos hateten, bankada refere laiha problema ho koligasaun anteriór Frente Dezenvolvimentu Demokrátiku (FDD) tanba koligasaun refere disolve ona no hetan legalidade hosi Tribunál Rekursu.
Tanba ne’e, nia dehan, laiha implikasaun ba bankada Parlamentár UDT-FM halo koligasaun foun ho Partidu Congresso Nacional da Reconstrução de Timor (CNRT) no partidu haat (4) seluk.
“Laiha implikasaun tanba ami ne’e fahe bankada de’it depois Frente Dezenvolvimentu Demokrátiku (FDD) disolve tiha ona. Ami iha baze legál tanba ami ba to’o iha Tribunál Rekursu hetan legalidade no ami fahe-malu ona. Agora, ami iha ne’e mak UDT ho FM bankada ida de’it no PUDD bankada ketak,” nia dehan Ajência TATOLI iha resintu PN, ohin.
Nia esplika, partidu tolu hanesan UDT, FM no PUDD armoniza nafatin iha Parlamentu Nasionál no ho Partidu Dezenvolvimentu Nasionál (PDN) ne’e laiha problema.
“Partidu Dezenvolvimentu Nasionál (PDN) ne’e laiha problema liu tanba PDN mai ne’e adezaun inkondisionál. Infelizmente nia la atinje kadeira sia (9) ne’ebé nia la tama, ne’e deklarasaun akta iha hotu. Tanba ne’e, ami hato’o ba Parlamentu Nasionál katak UDT-FM bankada ida no PUDD bankada ida,” Deputadu Francisco Carlos Xavier haktuir.
Partidu neen (6) ne’ebé daudaun ne’e forma koligasaun foun mak Partidu CNRT, PD, KHUNTO, UD, FM no PUDD.
Jornalista : Evaristo Soares Martins
Editór : Cancio Ximenes
