DILI, 11 marsu 2020 (TATOLI)-Ajénsia Internasionál ba Programa Aihan Mundiál (WFP-sigla inglés), hamutuk ho pesoál saúde hosi Klínika Vera Cruz Dili, kuarta (11/03/2020) divúlga informasaun kona-ba edukasaun saúde nutrisaun ba estudante na’in 24 hosi Eskola Sekundária 4 Setembru UNAMET Balide atu oinsá halo prevensaun ba moras anemia ka ran menus.
“Programa ne’e ita foka liu ba estudante feto sira ne’ebé ho idade adulsenti, tanba sira sei hasoru problemas ran menus ka anemia wainhira mesnturasaun ka fulan mai. Entaun hahan ne’ebé sira tenke konsumu mak naan, ikan, mantolun, feremungu, forerai fore keli, modo tahan no koto,” informa Koordenadór Programa Nutrisaun husi WFP, Inácio dos Santos, ba Ajénsia TATOLI, iha Balide ohin.
Ho informasaun ne’e, Nia espera katak estudante feto sira bele iha koiñesementu natoon atu konsumu hahan ho nutrisaun aas hodi prevene anemia iha Timor-Leste.
“Feto ho idade adulsente mak hetan ona problema ran menus otomátikamente sei kategoria mánutrisaun, ida ne’e mak lahalo prevensaun ho hahan sira nakonu ho nutrisaun sei fó impaktu ba bebe kuandu sira sai inan,”nia hatutan.
Alende, estudante 4 Setembru UNAMET Dili, WFP hamutuk ho Ministériu Saúde sei fahe mós informasaun hanesan ba estudante hosi Eskola Ensinu Báziku 30 Agostu Comoro, Dili, nomos estudante hosi Munisípiu lima seluk hanesan, Bobonaro, Ainaro, Ermera, Covalima ho Rejiuan Autónomu Espesiál Oé-Cuse Ambeno (RAEOA).
Jornalista : Tomé Amado
Editór : Agapito dos Santos
