AFAMA Prepara Hela Apoiu Ba Vítima Inundasaun
DILI, 16 marsu 2020 (TATOLI)-Asosiasaun Família Militár (AFAMA) hahú prepara ona sasán nesesidade báziku inklui ropa atu fahe ba populasaun kapitál Dili ne’ebé sofre inundasaun iha sesta (13/03/2020).
Notísia Relevante : Jenerál Lere Mobiliza Forsa 500-rein Hamoos Fo’er iha Dili
Xefe Estadu Maiór Jenerál FALINTIL-Forsa Defeza Timor-Leste, Majór Jenerál, Lere Anan Timur dehan, hafoin akontese udan-boot, Prezidente Asosiasaun Família Militár (AFAMA) atuál membru Parlamentu Nasional hosi Bankada FRETILIN, Cidália Mesquita Ximenes ho nia membru sira kontaktu malu kedas hodi tau osan para sosa sasán.
Nia dehan, AFAMA rasik kria ona ajenda, ohin, sei fahe uluk apoiu umanitáriu ba povu sira ne’ebé hela iha área Igreja Becora, Bidau no Katedrál inklui edifísiu Bombeiru nian.
“AFAMA mós prepara ona ajuda umanitáriu sira ne’ebé orasida lokraik sei lori fó ba padre no madre sira maka sei fahe ba ita nia populasaun sira,” dehan Lere ba jornalista, ohin, iha Santa Krús, Dili.
Jenerál Lere dehan, apoiu ne’e ki’ik la hanesan ho governu nian, maibé AFAMA hakarak fahe nia domin ba povu. AFAMA mós sei koordena ho Ekipa Diresaun Saúde Militár sei fó konsulta saúde gratuita ba povu sira ne’ebé sofre moras kauza hosi inundasaun.
Jornalista : Eugénio Pereira
Editór : Francisco Simões
