CNRT Konsidera Mosaun Destituisaun Hasoru Kompozisaun Meza PN Ne’e Issue De’it
DILI, 04 maiu 2020 (TATOLI)—Bankada Parlamentár Congresso Nacional Reconstrução de Timor (CNRT) konsidera deklarasaun Vise-Xefe Bankada Partidu Libertasaun Populár (PLP), Francisco de Vasconcelos, kona-ba atu halo mosaun destituisaun hasoru kompozisaun meza atuál ne’e inssue de’it.
Vise-Xefe Bankada CNRT, Patrocínio dos Reis Fernandes, hateten deklarasaun ne’e buat ida issue de’it tanba seidauk iha infromasau formál.
“Ha’u labele fó komentáriu kona-ba ida-ne’e. Ne’e ha’u konsidera hanesan issue ka rumoris de’it tanba seidauk iha informasaun formál ruma. Se sira aprezenta duni, ita sei haree,” dehan Vise-Xefe Bankada Parlamentár CNRT, Patrocínio dos Reis Fernandes, ba jornalista sira iha resintu Parlamentu Nasionál, segunda ne’e.
Bainhira jornalista Agência TATOLI tenta konfirma asuntu ne’e ba Prezidente Parlamentu Nasionál, Arão Noé de Jesus da Costa Amarál, maibé Prezidente Parlamentu Nasionál lakohi fó komentáriu ba asuntu refere.
Notísia Relevante: Bankada PLP, FRETILIN no KHUNTO Sei Hatama Mosaun Destituisaun Hasoru Kompozisaun Meza PN
Jornalista : Evaristo Soares Martins
Editór : Cancio Xiemenes
