Bankada FRETILIN, PLP no KHUNTO Keixa Brigada Negra Ba MP

DILI, 16 maiu 2020 (TATOLI)—Bankada Parlamentár kompostu hosi Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), keixa ona Brigada Negra ba Ministériu Públiku (MP).
“Ohin, loron-16 fulan-Maiu tinan-2020, reprezentante hosi bankada parlamentár FRETILIN, PLP no KHUNTO hatama ona keixa ida ba Ministériu Públiku hasoru organizasaun Brigada Negra ba sira-nia aktu deklarasaun ne’ebé ameasa órgaun soberania Parlamentu Nasionál iha loron-15 fulan-maiu tinan-2020 liu ba,” Bankada Parlamentár tolu (3) ne’e informa liuhosi Komunikadu Imprensa, ne’ebé Agência TATOLI, asesu, ohin.
Deklarasaun hosi Brigada Negra deklara ne’ebé Bankada Parlamentár tolu ne’e asesu, katak “karik vise sira brani halo duni iha segunda mai ne’e, maka ami aviza, ita boot sira loke dalan ona ba ami tomak atu la respeita tan lei no órgaun soberania. Ami sei mobiliza povu atu okupa kadeira iha Parlamentu Nasionál to’o Prezidente Repúblika dekreta disolusaun Parlamento Nasionál no konvoka Eleisaun Antesipada”.
Ho ameasa hosi Brigada Negra ne’e, Bankada Parlamentar FRETILIN, PLP no KHUNTO konsidera krime públiku no krime hasoru estadu tanba halo koasaun hasoru órgaun soberania Estadu nian, Parlamentu Nasionál no tenta perturba ninia funsionamentu normál.
“Ba ida-ne’e, deputadu sira hosi bankada parlamentár tolu ne’e hato’o keixa ba Prokuradár Jerál Repúblika atu hahú prosedimentu kriminál no loke invetigasaun ba krime hasoru Orgaun Soberania Estadu ida-ne’e,” komunikadu imprensa hosi Bankada FRETILIN, PLP no KHUNTO ne’e haktuir.
Jornalista : Evaristo Soares Martins
Editór : Cancio Ximenes

