DILI, 19 maiu (TATOLI)—Deputadu na’in-36 hosi Bankada parlamentár Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), aprova ona pedidu destituisaun ho votu a-favór 36.
Notísia Relevante: Bankada FRETILIN, PLP no KHUNTO “Obriga” Vise-Prezidente Na’in-Rua Ajenda Pedidu Destituisaun
Hosi votu 36 ne’e bankada FRETILIN kontribui votu 23, KHUNTO votu 5 no PLP votu 8. Purtantu laiha kontra no abstensaun.
Enterantu bainhira votasaun la’o namanas hela, deputadu sira hosi CNRT kontinua baku meza parlamentu hodi barralla plenária maibé parte PNTL asegura votasaun ne’e to’o nia rohan.
“Lalika hakfodak votasaun tenke kontinua to’o hotu,” dehan Deputada PLP, Regina Freitas, ne’ebé lee sai rezultadu votasaun.
Modelu votasaun ne’e sekretu liuhosi hakerek de’it no hetan partisipasaun másimu hosi deputadu sira hosi Bankada FRETILIN, PLP no KHUNTO. Votasaun ne’e prezide hosi Deputada FRETILIN, Nélia Soares Menezes.
“Votasaun ne’e illegal,” hakilar Deputadu CNRT, José Virgilio, iha Parlamentu Nasional.
Hosi Bankada PD, UD/FM no PUDD akompana de’it no la envolve iha prosesu votasaun ne’e.
Notísia Relevante: Bankada FRETILIN, PLP no KHUNTO Hatama Ona Rekerimentu Destituisaun Ba Meza PN
Jornalista : Evaristo Soares Martins
Editór : Cancio Ximenes
