DILI, 21 maiu 2020 (TATOLI)-Ministra Edukasaun Juventude no Desportu (MEJD), Dulce de Jesus Soares, tuir planu sesta (22/05/2020) sei halo enkontru ho liña ministeriál hodi deside planu re-ativa prosesu aprendijazen ba estudante pre-eskolár to’o ensinu sekundáriu hafoin implementasaun estadu emerjénsia iha fulan-marsu to’o maiu 2020.
“Ha’u seidauk bele informa bainhira mak atu re-ativa fila-fali atividade estudante sira nian ba ita bo’ot sira, maibé ami sei enkontru entre liña Ministeriál iha sesta aban, depois ha’u sei informa,” dehan Governante hafoin reuniaun Konsellu Ministru, iha salaun Ministériu Finansa Ai-Tarak-Laran, kinta ne’e.
MEJD mós sei hein desizaun governu nian liuhusi reuniaun Konsellu Ministru kona-ba implementasaun estadu emerjénsia.
Governante ne’e dehan tan maski fulan-rua implementasaun EE, Governu esforsu hodi implementa programa eskola ba uma liuhosi kanál RTTL, GMN, TVE no seluk tan inklui sistema online.
Alende ne’e halo mós distribuisaun livru ba estudante iha Munisípiu 12 inklui Rejiaun Autónomu Espesiál Oé-Cuse Ambeno (RAEOA).
Maski nune’e nia rekoiñese prosesu implementasaun la’o la másimu tanba estudante barak iha área rurál la asesu liña internet.
Jornalista : Tomé Amado
Editór : Agapito dos Santos
