FRETILIN-PD Husu Governu Esplika Pagamentu Subsídiu $100 Ne’ebé Atraza
DILI, 25 maiu 2020 (TATOLI)—Bankada parlamentár Frente Revolusionária Timor-Leste Independente (FRETILIN) no Bankada Partidu Demokrátiku (PD) husu governu tenke halo esplikasaun ba Parlamentu Nasionál kona-ba pagamentu subsídiu $100 ba kada uma-kain ne’ebé atraza.
“Atrazu ne’e seidauk iha esplikasaun mai fali parlamentu ida-ne’e, ne’ebé subsídiu ne’e tenke lais, karik bele. Fulan rua ona mak ita la’o hanesan ne’e, ita tenke lais nune’e povu labele halerik. Tenke buka-tuir impedimentu iha ne’ebé mak to’o ohin loron subsídiu seidauk to’o iha ita-nia maluk sira,” Deputadu David Dias Ximenes ‘Mandati” kestiona asuntu ne’e liuhosi plenária, Parlamentu Nasionál, segunda ne’e.
Deputadu Bankada FRETILIN afirma, asuntu ida-ne’e pertinente no emerjénsia, tanba ohin loron COVID-19 iha Timor zero ona maibé nasaun viziña sira komesa aumenta no ida-ne’e perigozu ba Timor-Leste.
“Agora ita-nia povu hein hela. Karik ita atu estende maibé sira laiha buat ida iha uma atu han. Sira maka sei husu ita para labele estende,” Deputadu Mandati hateten.
Entretantu, Deputadu Bankada Partidu Demokrátiku (PD), Adriano do Nascimento, hateten Governu presiza kria polítika hodi fó alternativa atui fó solusaun.
“Liga ba subsídiu ne’ebé ke atu fó maibé to’o agora seidauk, husu ba governu atu esplika difikuldade ne’e saida. Tanbasá mak to’o agora seidauk fó tanba povu sira hein hela,” Adriano do Nascimento hateten.
Hatán ba preokupasaun ne’e, reprezentante Governu atuál Sekretáriu Estadu Komunikasaun Sosiál (SEKOMS), Mericio Juvinal “Akara”, esplika Polítika governu nian loos ona maibé oras ne’e kestaun tempu de’it.
“Prosesu sei kontinua la’o. Ita sei selu $100 ne’ebé mak ema hotu sempre ko’alia. Em prinsípiu sei ezekuta tuir planu. Ita tenke rekoñese ita iha difikuldade balun, sistema balun tenke ajusta. Primeiru-Ministru orienta ona hodi aselera. Sábadu no domindu serbisu nafatin hodi bele rezolve iha tempu badak,” Governante ne’e esplika ba deputadu sira.
Notísia Relevante: Armanda Berta: “Governu Labele Promete Tanba Dadus Atu Simu Subsídiu Sei iha Faze Preparasaun”
Jornalista : Evaristo Soares Martins
Editór : Cancio Ximenes
