CNRT La Partisipa Debate Estensaun EE Tanba Sei Hein Justisa Hosi TR

DILI, 27 maiu 2020 (TATOLI)—Bankada Congresso Nacional da Reconstrução de Timor (CNRT) la partisipa debate estensaun Estadu Emerjénsia tanba hein hela justisa hosi Tribunál Rekursu kona-ba aktu asaltu podér ne’ebé mosu iha Parlamentu Nasionál.
Notísia Relevante: CNRT Kontinua “Buka Justisa” ho “Lia Loos”
“Ami la partisipa tanba ami sei hein justisa hosi Tribunál Rekursu kona-ba aktu asaltu podér iha Parlamentu Nasionál. Asaltu podér ida-ne’e viola Konstituisaun RDTL, Lei no Rejimentu Parlamentu Nasional. Ami hein hela tribunál atu pronúnsia aktu sira-ne’e ho lalais no justu”, Vise-Xefe Bankada CNRT, Patrocínio dos Reis Fernandes, informa liuhosi Konferénsia Imprensa, iha bankada CNRT, iha Parlamentu Nasionál, kuarta ne’e.
Vise-Xefe Bankada CNRT ko’alia kestaun ne’e hodi fó resposta ba lamentasaun Primeiru-Ministru, Taur Matan Ruak, ne’ebé kestiona CNRT la marka prezensa iha debate estensaun EE ne’e.

Entretantu Membru Bankada CNRT, Deputadu Adérito Hugo da Costa, konsidera lamentasaun Xefe Governu nian la pertinente tanba Prezidente PN, Aniceto Guterres, la eleitu ho dalan legál.
“Lalika mai kestiona fali CNRT, husu ba nia (Primeiru-Ministru) bankada PLP rasik, kona-ba aktu hadau podér iha parlamentu ida-ne’e,” nia dehan.
Entretantu, Xefe bankada UDT/FM, Deputadu Francisco David Xavier Carlos, hateten loloos ne’e Primeiru-Ministru la presiza kestiona tanba PPN, Aniceto Guterres la eleitu tuir lei no la tuir Rejimentu Parlamentu Nasionál.
Notísia Relevante: Xefe Governu Lamenta Auzénsia Deputadu Bankada CNRT iha Diskusaun Estensaun EE
Jornalista : Evaristo Soares Martins
Editór : Cancio Ximenes

