Reabilitasaun Gináziu Dili Atinje Pursentu 40

DILI, 28 maiu 2020 (TATOLI)-Diretóra Nasional Administrasaun no Finansa husi Sekretáriu Estadu Juventude no Desportu (SEJD), Maria Luisa Monteiro, hateten prosesu reabilitasaun edifísiu Gináziu Dili atinje ona pursentu 40.
Governu aloka orsamentu ba programa reabiltasaun ne’e pakote ho kontrusaun voliból praia hamutuk $ 412.595.61. Husi montante ne’e fahe ba reabilitasaun kampu voliból praia hamutuk $ 84.302.71.
Kompañia Victoria Construction Lda maka kaer obra reabilitasaun Jináziu Dili, enkuantu Voliból Praia konstrui husi kompañia DVP Construction.
“Durante estadu emerjénsia primeiro mak sira para maibé depois sira kontinua halo servisu agora dadauk Jináziu Dili ita bele dehan nia progresu fizíku inklui ho materiál ne’ebé mak iha atinje ona pursentu 40,”dehan Diretóra ne’e ba TATOLI, via Whatshapp, kinta ne’e.
Kompañia garante Victoria Construction Lda, garante sei finaliza projeitu ne’e iha tempu badak, maibé kompania DVP Construction konsege finaliza ona projeitu kampu voliból praia ne’ebé lokaliza iha área Lecidere Dili.
Governu reabilita obra rua ne’e ho objetivu atu realiza ba jogu CPLP tanba Timor-Leste maka sai uma na’in iha tinan 2020 ne’e.
Jornalista : Hortencio Sanchez
Editór : Agapito dos Santos

