Tribunál Rekursu Indefere Pedidu Arão Noé Amaral

DILI, 28 maiu 2020 (TATOLI) – Tribunál Rekursu (TR) liuhusi desizaun Juiz koletiva Deolindo dos Santos, Duarte Tilman Soares ho Juiz António José Fonseca de Jesus, kinta (28/05/2020), indefere karta pedidu rekursu Deputadu Arão Noé de Jesus Amaral nian.
Notísia Relevante : Arão Noé Sei Hato’o Rekursu Ba Tribunál Rekursu
Deputadu Arão Noé de Jesus da Costa Amaral, halo pedidu reklamasaun ba TR hodi husu TR halo fiskalizasaun konstitusionalidade tuir aetigu no rejimentu Parlamentu Nasional nian relasiona ho ‘aktu’ husi membru Parlamentu Nasionál husi Bankada tolu; PLP, FRETILIN no KHUNTO ne’ebé Arão Neo konsidera halo ‘asaltu podér’ hodi hadau kargu Prezidente PN, foin lalais ne’e.
Tuir informasaun ne’ebé Ajénsia Tatoli asesu husi akórdaun juiz

koletiva Tribunál Rekursu nian ne’e ho razaun katak, Tribunál Rekursu indefere pedidu Deputadu Arão Noé nian ne’e tanba TR konsidera hanesan aktu polítiku.
Iha desizaun Tribunál Rekursu nian ba rekursu kontensioza ne’ebé hatama husi rekerente Arão Noé de Jesus da Costa Amaral ne’e, Tribunál deside katak kualkér aktu ne’ebé mosu iha Parlamentu Nasionál la’ós halo rekursu ba Tribunál, maibé kabe ba desizaun meza Parlamentu Nasionál nian.
“Portantu forma ida ne’ebé ho aktu hasoru meza Parlamentu Nasionál, desizaun ne’e labele kabe ba Tribunál Rekursu.” Ne’e mak esklaresimentu husi karta juiz koletiva Tribunál Rekursu nian hodi indefere pedidu Deputadu Arão Noé nian ne’e.
Tribunál Rekursu indefere petisaun refere tanba bazeia ba artigu 355 kódigu prosesu sivíl kona-ba ‘Indeferimentu Liminar’ konsidera petisaun ne’e liminarmente indefere.
“Ho ida ne’e petisaun refere konsidera petisaun inisiál ne’e indeferida,” sita iha desizaun juíz koletiva nian ne’e hodi subliña mós artigu 66 númeru 1 rejimentu Parlamentu Nasionál nian mós hatete, kualkér desizaun Prezidente Parlamentu nian tenke haruka ba plenáriu.
Jornalista : Nelson de Sousa
Editór : Francisco Simões

