DILI, 03 juñu 2020 (TATOLI)- Komandu Polísia Nasionál Timor-Leste (PNTL) liuhusi Servisu Investigasaun Kriminál (SIK) kaer ona ema na’in-tolu (3) ne’ebé deskonfia involve iha lansa propaganda “lorosa’e-loromonu” atu fahe unidade nasionál.
Komandante Jerál PNTL, Komisáriu Faustino da Costa, deklara, ema hirak-ne’e polisia kaer iha sira-nia hela fatin, hafoin ekipa investigasaun buka tuir sira nia paradu liuhusi propaganda ne’ebé sira lansa iha rede sosiál Facebook.
“Kona-ba boatu ka rumoris ne’ebé lansa iha semana ida ne’e nia laran, polísia halo ona identifikasaun ba ema balun, ikus liu segunda liubá, ami ba foti ona ema na’in-tolu (3) no ami prosesa hela hodi submete ba Ministériu Públiku,” informa Komisáriu Faustino da Costa , ohin, ba jornalista sira liuhusi konferénsia imprensa iha Komandu Jerál PNTL, Caicoli, Dili.
Komisáriu Faustino da Costa, esklarese katak, ema na’in-tolu (3) ne’ebé PNTL kaer iha indikasaun ba distribuisaun pamfletu propaganda ne’ebé fahe mós iha média sosiál Facebook kona-ba Lorosa’e-Loromonu.
“Ema sira-ne’e ita halo identifikasaun para prosesa. Ita hotu hatene, informasaun divulgada ne’ebé iha sai hanesan krime ida no polísia sei la tolera,” afirma Komisáriu Faustino da Costa.
Komandante Faustino dehan, informasaun propaganda ne’ebé deskunfia ema na’in-tolu ne’e lansa nu’udar krime kontra estadu, tanba tenta hafahe unidade nasionál.
Ema na’in-tolu ne’e, Komisáriu Faustino hateten, parte investigasaun aprezenta ona ba Ministériu Públiku hodi prosesa tuir lei.
PNTL mós sei kontinua halo investigasaun kle’an ba kualkér sidadaun no Timoroan se de’it ka grupu polítiku sira ne’ebé utiliza maneira oioin halo propaganda atu sobu unidade nasionál.
“Sei la tolera, se-se de’it maka iha ne’ebá ita sei prosesu hotu aprezenta ba Ministériu Públiku, tanba ne’e krime boot ida kontra ita nia nasaun,” Faustino lamenta.
Kona-ba identidade ema na’in-tolu nian, Komisáriu Faustino da Costa, seidauk bele fó sai kompletu, maibé autór balun ho inisiál AA no kazu ne’e sei prosesa ona ba Ministériu Públiku hodi aprezenta ba Tribunál.
Iha parte seluk, PNTL mós halo ona identifikasaun ba ema na’in-haat (4) ne’ebé deskonfia lori rama ambon hana kanek joven ida iha área Kampu Alor, Dili, iha semana liubá.
Jornalista : Eugénio Pereira
Editór : Francisco Simões
