BAZARTETE, 13 juñu 2020 (TATOLI)- Abitante Suku Leorema, Postu Administrativu Bazartete, Munisípiu Liquiça hamutuk família uma-kain 1.774 simu ona subsídiu $200 husi Governu.
Notísia Relevante : Xanana Presta Omenajen Ba Saudozu Nicolau Lobato ho Família
Subsídiu ho montante $354.800 ne’ebé aloka ba Suku Loerema simu direita husi uma-kain 1.774 ne’ebé horik iha aldeia-10 ne’ebé pertense ba Suku Leorema, hanesan Suku Bukumera, Baura, Cutulau, Ergoa, Fatuneiro, Hato-Hou, Manu-Lete, Rai Lulik, Urema ho Urluli.
“Totál família uma-kain 1.774 maka rejista hodi simu subsídiu ho ninia montante osan $354.800,” informa Xefe Suku Leorema, Sandra de Araújo Lobato, bainhira akompaña Lider Karizmátiku Kay Rala Xanana Gusmão, observa direita populasaun sira simu subsídiu iha Sede Suku Leorema, sábadu ne’e.
Nia dehan, prosesu pagamentu la’o di’ak no mosu duni reklamasaun kuaze 50 ne’ebé naran la taka sai, maibé ekipa tékniku no ekipa Ministériu Solidariedade, Sosiál no Inkluzaun (MSS) foti kedas dadus hodi rejista hein prosesu loron 15 foin halo pagamentu.
Autoridade suku ne’e hatutan, populasaun sira sente kontente tebes, tanba subsídiu ne’e ajuda direita sira hodi uza osan sosa hahán no nesesidade báziku.
Iha oportunidade ne’e, Xanana mós konversa direita ho populasaun sira hodi husu sira nia sentimentu kona-ba osan subsídiu ne’ebé governu fó.
“Osan $200 imi bele uza, tanba iha fatin barak ita haree katak, povu presiza tebes atu hetan osan para sosa netik buat ruma ba imi nia presiza uma-laran nian,” Xanana hateten.
Xefe Suku Loerema mós konvida Xanana hodi observa direita kondisaun sede suku ne’ebé komesa aat ona presiza hetan apoiu hodi hadi’a inklui aumenta fasilidade hanesan serbisu nian hanesan, komputadór no mákina printer hodi ajuda serbisu suku.
Promete Apoia Kapela Leorema
Iha parte seluk, Xefe Suku Sandra de Araújo Lobato hamutuk ho sarani sira konvida mós Xanana Gusmão, hodi halo vizita ba haree direita kondisaun kapela ne’ebé sarani sira rasik maka harii.
Xanana husu atu autoridade suku koopera ho sarani sira halo tiha dezeñu depois aprezenta ba nia hodi bele ajuda materiál konstrusaun.
“Ha’u hanoin kapela ne’e presiza halo boot liután, nune’e sarani sira mai misa karik sira bele livre hamriik no halo orasaun iha fatin ne’ebé luan,” dehan Xanana.
Iha vizita ne’e, Xanana ho sarani sira hala’o orasaun hodi reza no harohan hamutuk atu Nai Maromak bele tulun povu Timor-Leste sai husi konflitu.
Iha parte seluk, Katekista Kapela Leorema Amelio do Santos dehan, kapela ne’e sarani sira harii dezde 1992 too 2015 maka komunidade sira sobu hodi harii de’it ho kalén too agora.
Nu’udar sarani no populasaun Leorema sente agradese tebes ho vizita Xanana nian bele haree direita kondisaun kapela hodi fó apoiu iha tempu besik.
Jornalista : Eugénio Pereira
Editór : Francisco Simões
