DILI, 19 juñu 2020 (TATOLI)–Diretór Jerál Ministériu Solidaridade Sosoál Iinkluzaun (MSSI), Rui Manuel Gago Exposto, hateten xefe suku identifika naran lista benefisiáriu aldeia rua (2) hosi Suku Camea tama fali ba Suku Becora.
Notísia Relevante: Prosesu Pagamentu Besik Finaliza Tanba Atinje Ona 82%
Rui Exposto hatutan, kona-ba asuntu refere hosi parte Ministériu Solidaridade Sosoál Iinkluzaun halo ona diskusaun ho Ministériu Administrsaun Estatál (MAE).
“Asuntu ida ne’e, ami halo ona diskusaun ho Ministériu Administrsaun Estatál (MAE). Haree katak,aldeia rua (2) mak Aldeia Ailele-Hun no Ailok-Laran iha Suku Camea nian, ne’ebé mak naran iha lista benefisiáriu taka sai fali iha Suku Becora nian. Di’ak liu, osan iha ona ita-nia liman, selu ona ba sira. Tanba, sira-nia naran no sira-nia osan iha hotu ona Suku Becora ne’e, bele ba simu de’it,” dehan Rui Manuel Gago Exposto ba jornalista sira iha salaun MSSI, Caicoli, Dili, sesta ne’e.
Diretór jerál ne’e hateten, tanba uluk iha Suku Becora de’it maibé agora Suku Camea eziste tan entaun ho ida-ne’e mak naran sira uluk ne’e nafatin rejistu hela iha Suku Becora ne’ebá no seidauk muda ba Suku Camea nian.
Entaun, nia dehan, bele uza nafatin naran ida-ne’e hodi halo pagamentu no hafoin halo tiha pagamentu iha Suku Becora ramata mak konsentra fali iha Suku Camea iha aldeia rua no aldeia ida iha Suku Ailok.
“Ita tenke uza lista iha Suku Becora nian. Kona-ba relatóriu pagamentu nian ne’e, Autoridade Suku Becora mak sei halo hodi submete ba Governu,” nia dehan.
Nia haktuir, laiha problema ba prosesu pagamentu ba aldeia rua ne’e tanba suku mak iha mudansa maibé naran laiha mudansa. Tanba ne’e, nia dehan, di’ak liu halo ona pagamentu duké osan ne’e fila fali ba kofre Estadu hafoin halo tan proposta entaun prosesu sei kleur tebes.
“Iha ona konkordánsia entre MAE-MSSI katak nafatin halo pagamentu ba aldeia rua (2) iha Becora no aldeia ida iha Suku Ailok,” nia dehan.
Jornalista : Osória Maques
Editór : Cancio Ximenes
