DILI, 21 juñu 2020 (TATOLI)-Dosente Fakuldade Ekonomia Universidade da Paz (UNPAZ), Alex Pires, informa estudante na’in haat maka tenke halo internamentu iha Ospitál Nasionál Guido Valadares Dili (HNGV-sigla portugés), tanba hetan kanek hafoin mosu kazu insidente iha áreadór universidade nian.
Kazu insidente ne’e akontese iha domingu (21/06) madruagada pruvolta tuku 2:00 Otl, iha áreadór UNPAZ tanba mosu asaltu ida husi joven balun relasiona ho joven ida mate iha fatin akontesimentu.
Polisia Nasionál Timor-Leste (PNTL) Munisípiu Dili, daudaun ne’e halo hela prosesu investigasaun ba kazu insidente iha UNPAZ hodi hatene loloos motivu husi joven ida ne’ebé mak mate.
“Konfrontu hodikalan iha UNPAZ, estudante na’in haat mak tama HNGV maibé na’in tolu alta ona no na’in ida mak grave sei halo hela tratamentu intensivu,”informa, Alex Pires, bainhira halo vizita ba estudante ne’ebé kanek ho baixa iha Sala Cirurjia Mulher HNGV, ohin.
Nia hatutan estudante ida ne’ebé hetan kondisaun fiziku grave ne’e, tanba monu husi andar leten edifísiu UNPAZ bainhira akontese kazu ne’e.
“Tuir informasaun ne’ebé mak ha’u asesu ne’e katak alin ida mate ne’e ema joven sira iha bairo laran mak mai hemu tua ho estudante estajiáriu sira ne’e bainhira matebian ne’e ba haris fatin mak sama kois iha andar leten mak monu tun ba lori mate laiha ema mak dudu nian,”nia hateten.
Atu rezolve problema ne’e maka parte universidade daudaun ne’e kontaktu ona família matebian atu rezolve tuir dalan família.
Iha parte seluk, matebian nia-isin mate oras ne’e submete ona ba prosesu autopsia iha Sala Mortuáriu HNGV Dili.
Entretantu, Jornalista sira tenta halo intervista ho parte Doutór sira ne’ebé atende pasiente hirak ne’e maibé la konsege tanba laiha fatin.
Jornalista : Felicidade Ximenes
Editór : Agapito dos Santos
