DILI, 22 juñu 2020 (TATOLI)-Ministra Saúde, Odete Maria Freitas Belo, hateten daudaun ne’e Ministériu laiha estoke ai-moruk kímiku ba halo fomigasaun no abate hodi rega susuk sira iha bee nalihun atu prevene moras dengue iha rai-laran.
Tuir dadus ne’ebé fó sai husi Ministra Saúde katak komesa fulan-janeiru to’o meadu juñu 2020 rejista kazu moras dengue hamutuk 1.000-resin no hamate ona pasiente na’in 10 iha Timor-Leste.
”Ita-nia item balun laiha ona armazen entaun ida ne’e afeta tebes liliu estoke abate mak laiha ona,”informa, Ministra Saúde ba jornalista sira iha Palacio do Governo Dili, segunda ne’e.
Ministériu Saúde planea ona sei sosa estoke ai-moruk dengue nian ne’ebé mamuk ona hafoin implementasaun Estadu Emerjénsia ramata iha fulan juñu nia rohan.
Governu konsidera kazu dengue ho númeru aas iha Timor-Leste, maibé durante fulan hirak ikus ne’e konsentra maka’as liuba prograsaun surtu COVID-19, tanba ne’e ba oin presiza atu sensibiliza informasaun ba komunidade kona-ba prevensaun dengue, fomigasaun no kampaña nasionál sira.
”Depois profisionál saúde mós halo fomigasaun ba fatin sira ne’ebé mak afetadu ba moras dengue no tau mós ai-moruk abate ba iha bee laran para atu hamate dengue ida ne’e entaun servisu sira ne’e kontinua la’o nafatin,”tenik Odete.
Meius diak no loos atu prevene moras dengue sira, Ministra Saúde sujere ba ko munidade idaidak atu hamoos uma laran bebeik, labele husik bee nalihun hodi kontribui ba susuk Aedes aegypti atu dezenvolve sai barak liután, hamos uma hun, vazu ai-funan no seluk tan.
”Durante fulan-janeiru to’o meadu juñu kazu dengue hamutuk 1000-resin no mate na’in 10 tanba agora daudaun surtu dengue mak sa’e maka’as no la’ós dengue deit maibé iha mós moras la hada’et sira seluk mós sa’e maka’as tanba durante ne’e ita haree liuba COVID-19,”dehan Odete.
Jornalista : Felicidade Ximenes
Editór : Agapito dos Santos