DILI, 01 jullu 2020 (TATOLI) – Primeiru Ministru (PM), Taur Matan Ruak orienta ona Ministru Petróleu no Minerál, Victor da Conceição Soares atu kontinua polítika Xefe Negosiadór Prisipál ba Delimitasaun Fronteira Marítima, Xanana Gusmão nia polítika atu dada Kadoras mai Timor-Leste.
“Tuir orientasaun ne’ebé ohin Primeiru-Ministru fó hatene katak buat sira ne’e (dada Kadoras mai Timor-Leste) tenke mantein nafatin no mantein mós kompeténsia Maun Boot Xanana Gusmão ne’ebé uluk Governu fó (nu’udar Xefe Negosiadór Prisipál ba Delimitasaun Fronteira Marítima),” tenik Ministru Victor da Conceição hafoin halo reuniaun dahuluk ho PM Taur iha Palásiu Governu, kuarta ne’e.
Kona-ba polítika dada Kadoras mai iha Timor-Leste, Ministru ne’e dehan laiha dúvida tanba polítika ne’e aliña ona ho Planu Estratéjiku Dezenvolvimentu Nasionál (PEDN), ho nune’e Governu liuhosi Ministériu Petróliu no Minerál (MPM) mós kontinua mantein.
“Ha’u-nia tékniku sira seidauk fó detallu informasaun ba kestaun ne’e, maibé presiza iha kontinuasaun,” nia subliña.
Governante ne’e informa, daudaun ne’e iha hela faze konsolida institusionál atubele estabelese lei orgánika hodi reorganiza ministériu ne’ebé durante tinan-rua abandonadu liuhosi apoia jurídiku Gabinete Primeiru Ministru.
Antes ne’e, Prezidente Autoridade Nasionál Petróleu no Minerál (ANPM), Gualdino da Silva, informa prosesu negosiasaun ba Greater Sunrise la’o hela iha nível bilaterál no trilaterál, no iha tinan ne’e (2020) finaliza ona konseitu ba dezenvolvimentu Greater Sunrise.
Hafoin Timor-Leste no Austrália troka nota diplomátika kona-ba tratadu fronteira marítima no entra ein vigór iha 30 agostu 2019, Estadu Timor-Leste liuhosi ANPM hala’o negosiasaun ho Governu Austrália inklui kompañia sira hodi finaliza konseitu dezenvolvimentu Greater Sunrise.
Kona-ba operasaun petrolífera iha kampu, Estadu Timor-Leste halo ona kontaktu ho Austrália no kompañia Joint Venturesira inklui Empreza Estatál TIMOR GAP atu iha fulan-neen nia laran iha tinan ne’e finaliza rejime kontratuál no fiskál úniku ba projetu iha kampu ne’e.
ANPM rasik mak lidera negosiasaun no partisipa direita mós husi TIMOR GAP nu’udar kontraktór estratál atu prepara planu no finaliza konseitu dezenvolvimentu nasionál.
Negosiadór Prinsipál ba asuntu Fronteira Marítima, Xanana Gusmão antes ne’e apela ba públiku atu lalika dúvida ona tanba kadoras Greater Sunrise sei dada mai iha Timor- Leste.
Nasaun rua ne’e presiza hala’o negosiasaun hodi iha konkordánsia maka bele hala’o esplorasaun ba kampu Greater Sunrise tanba média line ne’ebé fahe fronteira iha kampu ne’e balun tama iha área jurizdisaun Austrália.
Iha prosesu negosiasaun antes ne’e, Greater Sunrise bainhira dada mai Timor-Leste, sei afavór porsentu 70 no Austrália hetan porsentu 30 no bainhira dada ba Austrália, sei afavór porsentu 20 no ba Timor-Leste porsentu 80.
Jornalista: Florêncio Miranda Ximenes
Editora: Julia Chatarina
