DILI, 02 jullu 2020 (TATOLI)–Xefe Suku Comoro, Postu Administrativu Dom Aleixo, Munisípiu Dili, Eurico da Costa de Jesus, hateten prosesu pagamentu iha Suku Comoro finaliza iha loron 28 juñu 2020 maibé autoridade suku sei kontinua halo pagamentu ba benefisiáriu sira ne’ebé mak moras no balun la mai maski naran sai iha lista benefisiáriu nian.
“Iha ami-nia Suku Comoro finaliza ona pagamentu subsídiu $200 iha 28/06/2020 maibé ami sei kontinua fahe osan ba ita-nia maluk benefisiáriu sira ne’ebé mak naran sai iha lista benefisiáriu mak seidauk simu ho razaun katak sira moras no iha benefisiáriu balun mak lamarka prezensa iha momentu simu subsídiu ne’e,” Xefe Suku Comoro, Eurico da Costa de Jesus ba Agência TATOLI via telefónika, kinta ne’e.
Nia hatutan, maski pagamentu finaliza ona maibé suku Comoro iha inisiativa no vontade ida katak tenke halo hotu pagamentu ba ema ne’ebé mak seidauk hetan nia direitu tanba osan refere sei iha sede suku.
Xefe suku ne’e hateten, ema ne’ebé mak la simu osan no ema ne’ebé mak fó fila osan ba kofre estadu hamutuk ema na’in-113 maibé iha aldeia balun mós seidauk ajusta hotu.
“Ita seidauk ajusta hotu tanba sei iha aldeia balun ne’ebé mak sei haree hela dadus benefisiáriu sira. Maibé númeru ne’ebé mak ha’u simu hosi aldeia daudaun ne’e ho totál 113 benfisiáriu,” xefe suku ne’e relata.
Jornalista : Osória Marques
Editór : Cancio Ximenes
