DILI, 03 jullu 2020 (TATOLI)-Sentru Saúde Comoro durante fulan neen, janeiru to’o juñu 2020 ne’e rejista ona pasiente moras dengue hamutuk ema na’in 464 no afeta maioria ba labarik kiik no ema boot.
Husi númeru ne’e, pasiente na’in lima la konsege salva sira-nia vida.
”Janeiru to’o juñu ami Sentru Saúde Comoro rejistu kazu dengue hamutuk 464 no nai’n lima mak mate ,” relata husi Xefe Sentru Saúde Comoro, Milena do Rego, ba jornalista iha ninia servisu fatin.
Kazu ne’e maioria afeta ba labarik ho tinan lima mai kraik. No pasiente ne’ebé mak mate tanba hetan ona kondisaun grave hafoin bá halo tratamentu saúde iha iha fatin ne’ebá.
Pesoál Saúde husi Sentru Saúde Comoro sempre halo promosaun liliu sensibiiza informasaun no avizu ba komunidade iha área Dom Aleixo atu prevene an husi moras dengue hodi hamoos uma laran, ambiente no seluk tan.
Aleinde ne’e, halo mós fogin no abate ba fatin sira ne’ebé risku ba susuk nune’e bele halo prevensaun ba moras la hada’et ne’e.
Iha Suku Comoro, Manleuana no Bairo-Pité hanesan área risku ba hamosu moras dengue iha Postu Administrivu Dom Aleixo nian.
”Susuk dengue ne’ebé mak gosta tata ema iha loron de’it hanesan loron matan sa’e dader ka antes loron matan tuun lokraik tanba ne’e mak ita halo prevensaun mak toba iha muskateriu laran tau roupa liman naruk atu nune’e bele prevene moras ne’e,”nia sujere.
Jornalista : Felicidade Ximenes
Editór : Agapito dos Santos
