DILI, 16 jullu 2020 (TATOLI) – Asosiasaun Difientente Timor-Leste (ADTL) hala’o enkontru ho Ministériu Asuntu Parlamentár no Komunikasaun Sosiál (MAPKOMS) hodi hato’o perokupasaun haat importante hodi Governu bele buka solusaun.
“Sira husu ba ha’u, karik iha Konsellu Ministru ka halo komunikasaun ho parseiru sira, bele fó atensaun mós ba ema ho defisiente sira no kria kondisaun atu sira mós bele iha diretu hanesan ho seluk,” tenik Ministru Asuntu Parlamentár no Komunikasaun Sosiál, Francisco Martins da Costa Jerónimo ba Agência Tatoli, kinta ne’e.
Kestaun daruak maka parte ADTL hakarak husu Governu atu aumenta eskola bázika no eskola sekundária ba ema ho defisiénsia sira.
“Tanba sira mós presiza asesu ba eskola. Tuir dadus ema defisiente iha Timor-Leste hamutuk 40.000 resin, enkuantu tuir dadus 2015 hamutuk 38.000, tanba ne’e sira husu atu fó atensaun tanba sira aumenta barak ba bebeik,” nia akresenta.
Kestaun datoluk maka ADTL hato’o konvensaun ne’ebé presiza ratifika iha Parlamentu Nasionál, nune’e bele tau-matan.
Kestaun impotante seluk ne’ebé parte ADTL husu ba MAPKOMS maka fatin ba ema ho defisiente psikolojikamente.
“Fatin atu tau sira la to’o. Entaun sira presiza, nune’e husu Primeiru-Ministru ajuda ko’alia mós ho ministru tutela ba área sira ne’e atubele ajuda haree ba situasaun,” dehan Minstru Jerónimo.
Asuntu ikus ne’ebé maka ADTL husu ba Governu liuhosi MAPKOMS maka harii rádiu komunidade ida.
“Ha’u dehan ba sira katak rádiu komunidade iha ami-nia tutela no ha’u hanoin katak ami buka hela dalan ho parseiru sira karik bele fó apoiu ida Governu atubele providénsia, nune’e bele responde ba sira-nia proposta estabelese rádiu komunidade,” nia subliña.
Jornalista: Natalino Costa
Editora: Julia Chatarina
